Foto: Aqorda
Memleket basshysy Qasym-Jomart Toqaev Qazaqstan halqyn Jańa jylmen quttyqtady, dep habarlaidy Aqordaǵa silteme jasap Ult.kz.
Prezidenttiń quttyqtaý sózi:
2025 jyl halqymyz úshin mereili jyl boldy
Qymbatty otandastar!
Biz birneshe minýttan keiin Jańa jyldy qarsy alamyz. Tól tarihymyzdyń taǵy bir belesine qadam basamyz.
Jurtymyz Jańa jyldy erekshe kóńil kúimen kútedi. Ár adam osy sátte arman-tilegin aitady. Eski jyldyń eń áserli sátterin eske alady. Bolashaqqa jospar quryp, zor úmit artady.
2025 jyl halqymyz úshin mereili jyl boldy. Elimiz damýdyń dańǵyl jolyna tústi. Álemdegi ahýal kúrdeli bolsa da, ekonomikamyz órkendep, ishki jalpy ónim 6 paiyzdan asty. Qazaqstannyń altyn-valiýta qory 62 milliard dollardan asty.
Elge aýqymdy investitsiia tartyp, birqatar iri jobany júzege asyrdyq. "Dostyq – Moiynty" temirjolynyń ekinshi jelisi iske qosyldy. Bul – Táýelsizdik kezeńindegi eń iri temirjol qurylysy.
Sondai-aq on úsh myń shaqyrym avtokólik joly salynyp, jóndelip jatyr. Sonyń arqasynda Qazaqstannyń tranzittik áleýeti arta tústi.
Diqandarymyz ekinshi jyl qatarynan mol ónim alyp, qambany astyqqa toltyrdy. Aýyldy jáne aýyl sharýashylyǵyn damytýǵa basa mán berip jatyrmyz. Sharýalarǵa buryn-sońdy bolmaǵan qarjylai qoldaý kórsetildi, iaǵni 1 trillion teńge osy maqsatqa jumsaldy.
Biyl jalpy aýmaǵy 19 million sharshy metrden astam turǵyn úi salyndy. Myńdaǵan otbasy baspanaly boldy.
Áleýmettik salada kóp sharýa jasaldy. Júzden astam mektep, eki júzge jýyq densaýlyq saqtaý nysany boi kóterdi. Álemniń úzdik joǵary oqý oryndarynyń filialdary ashyldy.
Adam quqyqtaryn qorǵaýǵa basa mán berilip jatyr. Qoǵamda "Zań men tártip" qaǵidaty ornyǵa tústi, azamattarymyzdyń quqyqtyq sana-sezimi kúsheiýde.
Biz ár jetistikke jurtymyzdyń eren eńbeginiń arqasynda jettik.
Azamattarymyz bilim, ǵylym, mádeniet salalarynda biik belesterdi baǵyndyrdy. Olar halqymyzdy rýhy asqaq, ziiatker ult retinde tanytýǵa zor úles qosty.
Oqýshylarymyz halyqaralyq bilim saiystarynda top jardy. Sportshylarymyz álemdik dodalarda úzdik shyqty, Kók týymyzdy jelbiretti.
Biyl biz "Jumysshy mamandyqtary jylyn" atap óttik. Eńbek adamdaryna airyqsha qurmet kórsettik. Bul úrdis aldaǵy ýaqytta da jalǵasyn tabady.
Memleket muǵalimder men dárigerlerge jan-jaqty qoldaý kórsetti jáne osy saiasat uzaqmerzimdi strategiialyq sipatqa ie boldy. Elimizdiń mádeniet jáne ǵylym qairatkerlerine jan-jaqty qoldaý kórsetildi.
Adal eńbektiń qadirin biletin ulttyń keleshegi de jarqyn bolmaq. Óz kásibiniń naǵyz mamany bolǵan otanshyl azamattar elimizdiń kóshin alǵa bastaidy.
Osylaisha, HHI ǵasyrdyń birinshi shiregin abyroimen aiaqtadyq. Ekonomikalyq jáne áleýmettik kórsetkishter boiynsha Qazaqstan osy saiasi-geografiialyq keńistikte kósh bastady.
Bárimiz bir el bolyp Ádiletti, Qaýipsiz, Kúshti, Taza, Ozyq Qazaqstandy quryp jatyrmyz.
Endi, mine jylqy jylyna aiaq basqaly turmyz. Qazaq úshin qazanattyń orny qashan da bólek. Halqymyz "Jylqy jyly jaily bolady" dep yrymdaidy. Biz kelesi jyldan kóp jaqsylyq kútemiz. Órkenietti ult retinde alysqa kóz tigemiz. Alǵa qoiǵan biik maqsatymyz jáne naqty josparymyz bar.
Biz memlekettik mańyzy airyqsha "Taza Qazaqstan" jobasyn bir qoǵam bolyp júzege asyra beremiz. Aýyldarymyz ben qalalarymyz taza, jasyl jelegi mol ári ómir súrýge qolaily bolýǵa tiis.
Bul Táýelsizdiktiń 35 jyldyǵyna orai el damýyna qosqan eń úlken úlesimiz bolmaq. Biz osy tarihi mejeni naqty ispen atap ótemiz.
"Birligimiz – áralýandyqta" degen qaǵidatqa negizdelgen qoǵamdyq kelisim men turaqtylyq – barlyq jetistigimizdiń bastaýy.
Memleket aldaǵy ýaqytta da halyqaralyq quqyqqa jáne ult múddesine sai keletin syndarly ári baiypty syrtqy saiasat júrgizedi.
Qazaqstannyń usynysymen Birikken Ulttar Uiymy 2026 jyldy Halyqaralyq eriktiler jyly dep jariialady. Halyqaralyq eriktiler qozǵalysy tileýlestik, meiirimdilik syndy myzǵymas adamgershilik qundylyqtaryn pash etedi. Bul – bizdiń de halqymyzǵa tán asyl qasietter.
Jańa jyldyń mańyzdy ózgeristerge toly jyl bolary sózsiz. Bul ózgeristerdiń qanshalyqty jemisti bolatyny ózimizge bailanysty.
Biz bárimiz tabandy eńbek etýimiz kerek, sonda ǵana elimiz zor tabystarǵa jetedi. Bul, eń aldymen, halqymyzǵa qajet.
Dál qazir Jańa jyldy jumysta qarsy alyp jatqan azamattarymyz bar. Bul – óz isine adaldyq pen qoǵam aldyndaǵy jaýapkershiliktiń jarqyn kórinisi.
Men Sizderdiń tabandy eńbekterińizdi joǵary baǵalaimyn. Sizderge arnaiy quttyqtaýymdy joldaimyn. Elimizdi kórkeitýge úles qosyp júrgen barsha azamatqa zor alǵys aitamyn.
Shyn máninde, týǵan elge qyzmet etýden artyq baqyt joq. Halqymyz "Yntymaq bar jerde – yrys bar" deidi. Sondyqtan berekeli birligimizdi saqtap, birtutas ult bolyp elimizdi damyta bereiik.
Búgin osy erekshe sátte jastar men balalarǵa úndeý joldaǵym keledi.
Qazir – múldem jańa qubylystar jáne zor múmkindikter dáýiri. Árkim, eń aldymen, ózine, boiyndaǵy kúshi men qabiletine senýi kerek.
Uly Abaidyń "Ózińe sen, ózińdi alyp shyǵar, eńbegiń men aqylyń eki jaqtap" degen sózi árdaiym ózekti. Belsendi, bilimdi, eńbekqor, tártipti, ushqyr bolyńyzdar. Joldaryńyz ashyq bolsyn! Árqashan alar asýlaryńyz biik bolsyn!
Elimizdiń ár azamatyna zor densaýlyq, amandyq jáne tabys tileimin!
Tórt qubylamyz túgel bolsyn! Ár shańyraq jaqsylyqqa tolsyn! Kók týymyz máńgi jelbiresin! Otanymyz – Qazaqstan Respýblikasy, Qazaq Eli jasai bersin!
Jańa jyl qutty bolsyn!
