Foto: Aqorda
Prezident Qasym-Jomart Toqaev Qazaqstan Qarýly Kúshterindegi kadrlyq ózgerister týraly úkimderge qol qoidy, dep habarlaidy Ult.kz.
Qurlyq áskerleriniń bas qolbasshysy Asan Júsipov pen «Ońtústik» óńirlik qolbasshylyǵy áskerleriniń qolbasshysy Qýanyshbek Ushtaev qyzmetterinen bosatyldy.
Endi Qurlyq áskerlerin Mereke Kúshekbaev basqarady. Ol Almaty áskeri ýchilishesin, Ulttyq qorǵanys ýniversitetin jáne Resei Bas shtaby akademiiasyn bitirgen. Ár jyldary áskeri bólimderdi basqarǵan, desanttyq-shabýyldaý áskerlerine qolbasshylyq etken jáne jaýyngerlik daiarlyqpen ainalysqan. 2023 jyldyń qarashasynda Qurlyq áskerleriniń bas qolbasshysynyń birinshi orynbasary bolyp taǵaiyndalǵan. «Dank», «Aibyn» II dárejeli ordenderimen jáne medaldarmen marapattalǵan.
«Ońtústik» óńirlik qolbasshylyǵy áskerleriniń jańa qolbasshysy bolyp Erjan Ibraev taǵaiyndaldy. Ol Almaty joǵary áskeri ýchilishesin «motoatqyshtar áskerleriniń komandalyq taktikalyq» mamandyǵy boiynsha támamdaǵan, sondai-aq Ulttyq qorǵanys ýniversiteti men Resei Bas shtabynyń áskeri akademiiasynda bilim alǵan. Áskeri mansabynda leitenanttan polkovnikke deiingi joldan ótti, vzvodtar men áskeri bólimderge basshylyq etti. 2023 jyldyń qarashasynan bastap «Astana» óńirlik qolbasshylyǵy áskerleriniń qolbasshysy qyzmetin atqarǵan.
Keshe memleket basshysy Qasym-Jomart Toqaev Qorǵanys ministrin qabyldady. Rýslan Jaqsylyqov prezidentke armiianyń jaǵdaiy, memlekettik qorǵanys tapsyrysy jáne bitimgershilik missiia týraly baiandady.
