rezident Qasym-Jomart Toqaevtyń tóraǵalyǵymen qazaq tili álipbiin latyn grafikasyna kóshirý máselesi boiynsha keńes ótti, dep habarlaidy "Ult aqparat" Aqordanyń resmi saityna silteme jasap.
Jiynda Mádeniet jáne sport ministri Aqtoty Raiymqulova, Bilim jáne ǵylym ministri Ashat Aimaǵambetov, lingvist-ǵalymdar men sarapshylardyń qazaq tili álipbiin latyn grafikasyna kóshirý jumystarynyń nátijesi boiynsha baiandama jasady.
Aqtoty Raiymqulova ǵylymi turǵydan zerdelengen álipbi jobasyn usyndy. Jetildirilgen álipbi halqymyzdyń jazý dástúrinde ornyqqan «bir dybys – bir árip» printsipine tolyq sáikes keledi, digraftar, iaǵni bir dybysty eki nemese odan kóp tańbamen belgileý printsipi qoldanylmaidy. Bul álipbi jobasynda qazaq tiliniń 28 dybysy tolyq qamtylǵan.
Bilim jáne ǵylym ministri Ashat Aimaǵambetov jańa álipbidiń mektepter men bilim berý uiymdaryna júieli túrde engizýdiń aldyn ala daiyndyq kezeńderi, ustazdardy, oqýlyqtardy daiarlaý men ádistemelik quraldardy jańartý máselesi boiynsha aqparat berdi. Onyń aitýynsha, barlyq sharalar keshendi túrde kezeń-kezeńimen, aldyn ala tolyq daiyndyq júrgizilgennen keiin uiymdastyrylatyn bolady.
Memleket basshysy keńeste qaralǵan máseleler boiynsha birqatar tapsyrmalar berdi. Atap aitqanda, álipbi jobasy ǵalymdarmen birge tolyq zerdelenip, Úkimet janyndaǵy Qazaq tili álipbiin latyn grafikasyna kóshirý jónindegi Ulttyq komissiianyń kezekti otyrysynyń qaraýyna engizýdi tapsyrdy.
Atalǵan komissiia otyrysynyń qorytyndysy shyqqannan keiin Úkimet jetildirilgen álipbidi bekitý týraly Jarlyq jobasyn Prezident Ákimshiligine engizýi tiis.
– Jańa álipbi bastamasy – bul kúrdeli ári shetin másele ekenin umytpaǵan jón. Jańa grafikany engizý bir kúnde ia bolmasa, tipti, bir jylda iske asa qoiatyn jumys emes. Áitpese, asyǵystyq búkil mádenietimizge jáne tarihi bolmysymyzǵa ziian keltirýi múmkin. Másele – kirillitsadan latyn álipbiine aýdarýda emes, bul qazaq tiliniń aýqymdy reformasy degen sóz. Qarjy máselesin de eskerýimiz kerek. Latyn álipbiin engizý jumysy birtindep júzege asýy kerek. Negizinde, bul grafika jas urpaqqa arnalǵan dep aitýǵa bolady. Onyń igiligin, eń aldymen, solar kórýi kerek. Sondyqtan, bul úrdis josparly túrde, birtindep iske asyrylýy qajet, – dedi Memleket basshysy.
Qasym-Jomart Toqaev Mádeniet jáne sport, Bilim jáne ǵylym, Aqparat jáne qoǵamdyq damý ministrlikterine ǵalymdardy, sarapshylar men ziialy qaýym ókilderin tarta otyryp, jańa álipbidi halyqqa jan-jaqty túsindirýge baǵyttalǵan keshendi aqparattyq jumys júrgizý týraly tapsyrma berdi.
