Foto: Akorda.kz
Prezident Qasym-Jomart Toqaev Qaraǵandy oblysynda «ArselorMittal Temirtaý» aktsionerlik qoǵamyna qarasty Kostenko atyndaǵy shahtada bolǵan órt saldarynan qaza tapqan kenshilerdiń otbasylary men týǵan-týystaryna kóńil aitty, dep habarlaidy "Ult aqparat" Aqordanyń baspasóz qyzmetine silteme jasap.
"Men Memleket basshysy retinde barshańyzǵa kóńil aitamyn. Bul – qasiret. Bárin túsinemin. Apat boldy. Apattyń kesirinen kóptegen adam qaza tapty. Sondyqtan bul jerge arnaiy keldim.
Tiisti sharalar qabyldaimyz, sonyń ishinde zardap shekkenderdiń otbasylaryna kómek kórsetemiz. Qaza tapqandar men zardap shekkenderdiń otbasylary eshqandai muqtajdyq kórmeýi úshin Úkimet, ákimdik jáne qaiyrymdylyq uiymdarynyń aldynda jan-jaqty kómek kórsetý mindeti tur", – dedi Memleket basshysy.
Prezident búkil elimiz boiynsha 29 qazan Jalpyulttyq aza tutý kúni bolyp jariialanatynyn jáne «ArselorMittal Temirtaý» kompaniiasyna qatysty tiisti shara qabyldanatynyn jetkizdi.
"Erteń búkil elimiz boiynsha jalpyulttyq aza tutý kúni jariialanady. Men «ArselorMittal Temirtaý» kompaniiasymen investitsiialyq yntymaqtastyqty toqtatý jóninde tapsyrma berdim. Bul mekeme Úkimetpen jáne kásiporynmen yntymaqtastyq turǵysynan bizdiń tarihymyzdaǵy eń nashar kompaniia boldy. Endi kásiporynnyń ózine qatysty sharalar qabyldaý týraly oilanýymyz kerek. Basin Vadim Borisovich degen azamat bar. Sizder ony bilesizder. Ol bir kezderi «ArselorMittalda» jumys istegen. Oblys ákiminiń orynbasary boldy. Men oǵan qaityp kelip, kásiporyndy basqarýdy tapsyramyn. Kásiporynnyń qazirgi basshylyǵynyń qolynan eshteńe kelmeidi", – dedi Qasym-Jomart Toqaev.
Memleket basshysynyń aitýynsha, jer astynda qalǵan kenshilerdi qutqarý, zardap shekken jáne qaza bolǵan azamattardyń otbasylaryna jan-jaqty kómek kórsetý – kezek kúttirmeitin mindet.
"Eń aldymen, qutqarý jumystary júrgiziledi. Ekinshiden, zardap shekkender men meditsinalyq kómekke muqtaj azamattardyń naqty sanyn anyqtaýymyz kerek. Úshinshiden, osy apattan zardap shekkenderdiń barlyǵynyń otbasyna materialdyq kómek kórsetemiz. Eger qajet bolsa, arnaiy qor ashamyz. Munymen ózim ainalysamyn", – dedi Prezident.
Sonymen qatar Memleket basshysy qazirgi ýaqytta kenshilerdiń zeinetke shyǵý jasyna qatysty másele qarastyrylyp jatqanyn aitty.
