Memleket basshysy Qarjylyq monitoring agenttiginiń tóraǵasy Janat Elimanovty qabyldady, - dep habarlaidy "Ult aqparat" Aqorda saityna silteme jasap.
Prezidentke Agenttiktiń "kóleńkeli" ekonomikaǵa qarsy is-qimyl boiynsha atqarǵan jumystarynyń qorytyndylary týraly málimet berildi.
"Qasym-Jomart Toqaevqa biylǵy 8 aida 1508 ekonomikalyq quqyq buzýshylyq anyqtalǵany, onyń 803-i aýyr jáne asa aýyr qylmystar sanatyna jatatyny jóninde baiandaldy. 36 uiymdasqan qylmystyq toptyń áreketterine tosqaýyl qoiylǵan. Alkogol ónimderin shyǵaratyn 26 jasyryn tseh pen 224 zańsyz oiynhana jabylǵan.
Agenttik tóraǵasynyń aitýynsha, sońǵy 4 jylda "kóleńkeli" ekonomika 29 paiyzdan 20 paiyzǵa deiin tómendegen", - delingen habarlamada.
Memleket basshysynyń tapsyrmasy boiynsha Úkimet Kóleńkeli ekonomikaǵa qarsy is-qimyldyń aldaǵy 3 jylǵa arnalǵan keshendi josparyn bekitti.
Janat Elimanov áleýmettik mańyzy bar baǵyttar boiynsha da jumystar jalǵasyp jatqanyn aitty. Atap aitqanda, azyq-túlik baǵalarynyń kóterilmeýin qamtamasyz etýge tiis turaqtandyrý qorlaryn qurý úshin bólingen biýdjet qarajatyn jymqyrýdyń 5 deregi anyqtalǵan. Taraz qalasynda jylý, Qyzylorda qalasynda gaz tasymaly tarifteriniń negizsiz kóterilýine jol berilmedi. Balalarǵa arnalǵan mamandandyrylǵan jáne meditsinalyq-áleýmettik mekemelerdiń laýazymdy tulǵalaryna qatysty 36 sotqa deiingi tergep-tekserý isi bastaldy. Olar 376 million teńge kóleminde zalal keltirgen.
Kezdesý qorytyndysy boiynsha Memleket basshysy birqatar naqty tapsyrma berdi.
