Memleket basshysy Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldady, - dep habarlaidy "Ult aqparat" Aqorda saityna silteme jasap.
Prezidentke biyl 11 aida qarjy naryǵyn damytý jáne qarjy uiymdaryn retteý jóninde atqarylǵan jumystardyń qorytyndysy týraly esep berildi. Memleket basshysyna biylǵy kúrdeli makroekonomikalyq jaǵdailarǵa qaramastan bank sektorynyń turaqtylyǵy men ornyqtylyǵy qamtamasyz etilgeni jóninde baiandaldy.
Mádina Ábilqasymovanyń aitýynsha, bankterdiń aktivteri jyl basynan beri 14,4 paiyzǵa ósip, 43,1 trillion teńgege jetken. Halyqtyń salymdary 16,8 paiyzǵa nemese 15,7 trillion teńgege deiin kóbeigen.
Sonymen qatar ekonomikany kreditteý isin yntalandyrý maqsatynda Agenttik kapital bosatýǵa jáne ótimdilikke qatysty retteý sharalaryn qabyldap, kepilzat saiasatyna qoiylatyn talaptardy jeńildetti. Nátijesinde ekonomikany kreditteý kórsetkishi jyl basynan beri 20,1 paiyzǵa nemese 22,2 trillion teńgege deiin artty. Onyń ishinde biznesti kreditteý kólemi 7,3 paiyzǵa nemese 8,3 trillion teńgege deiin ósken, sondai-aq shaǵyn jáne orta biznesti kreditteý kórsetkishi 8,6 paiyzǵa nemese 4,9 trillion teńgege deiin ulǵaiǵan.
Prezidentke halyqtyń shamadan tys kredit alýyn shekteý sharalary týraly aqparat berildi. Atap aitqanda, mikrokreditterdiń syiaqy mólsherlemesi tómendetilip, borysh júktemesiniń koeffitsientin esepteý tásili qatańdatyldy. Sondai-aq bankter men mikroqarjy uiymdarynyń (MQO) problemalyq kredittermen jumys isteý jónindegi jeke josparlary qabyldandy. Jalpy, mikroqarjy jáne kollektorlyq uiymdardyń qyzmetine qoiylatyn talap kúsheidi. Biyl 23 mikroqarjy uiymy men 35 kollektorlyq agenttiktiń qyzmeti toqtatyldy.
Agenttik tóraǵasynyń málimetinshe, saqtandyrý naryǵynda jańa áleýmettik saqtandyrý ónimderi engizilip, saqtandyrý qyzmetterin tsifrlandyrý úshin jaǵdai jasalǵan. Qor naryǵynda jeke sanattaǵy investorlardy qorǵaý sharalary kúsheitildi. Olardyń sany eki jylda 4 ese artyp, 526 myńǵa jetken.
Kezdesý sońynda Memleket basshysy qarjy naryǵyn retteý isin odan ári damytýǵa jáne osy salada turaqtylyqty qamtamasyz etýge baǵyttalǵan birqatar mindet júktedi.
