Qazaqstan Prezidenti birqatar memlekettiń elshilerinen senim gramotalaryn qabyldady, dep habarlaidy "Ult aqparat" Aqordaǵa silteme jasap.
Aqorda rezidentsiiasynda 7 memlekettiń tótenshe jáne ókiletti elshileriniń Qazaqstan Prezidentine senim gramotalaryn tapsyrý rásimi ótti. Senim gramotalaryn Mońǵoliia elshisi Dorj Baiarhýý, Grekiia elshisi Eftaliia Kakiopýlý, Indoneziia elshisi Mohamad Fadjrýl Rahman, Marokko elshisi Mýhammed Rashid Maaniný, Kanada elshisi Alan Ýilfred Hemson, Izrail elshisi Edvin Natan Iabo Glýsman, Majarstan elshisi Otto Ivan Rona tapsyrdy.
Qasym-Jomart Toqaev elshilerdi Qazaqstandaǵy diplomatiialyq missiialarynyń resmi bastalýymen quttyqtap, elimizdegi igi mindetterin oryndaý barysynda olarǵa Prezident Ákimshiligi men Qazaqstan Úkimeti tarapy jan-jaqty qoldaý kórsetetinin jáne kómektesetinin aitty.
Memleket basshysy 2022 jyldyń tarihi data, iaǵni Qazaqstan men olardyń elderi arasyndaǵy diplomatiialyq qatynastardyń 30 jyldyǵy ekenin atap ótti.
– Osy jyldar ishinde biz barlyq sala boiynsha jan-jaqty seriktestik pen ózara tiimdi yntymaqtastyqty jolǵa qoidyq. Bul baǵyt turaqty saiasi dialogty, qarqyndy ekonomikalyq yqpaldastyqty jáne belsendi gýmanitarlyq bailanystardy qamtidy. Eń bastysy, bizdiń qarym-qatynasymyz myzǵymas dostyqqa, ortaq qundylyqtarǵa jáne ózara qoldaý kórsetýge negizdelgen, – dedi Prezident.
Memleket basshysynyń pikirinshe, bul biylǵy jyldyń alǵashqy kúnderi ishki jáne syrtqy destrýktivti kúshter Qazaqstanǵa aýyr ári qatygezdikpen shabýyl jasaǵanda anyq kórindi. Qasym-Jomart Toqaev qazaqstandyqtardyń tabandylyǵy men ujymdyq parasattylyǵynyń arqasynda memlekettik tóńkeris jasaýshylarǵa toitarys berilgenin, al búlikshiler men buzaqylardyń jaýapqa tartylǵanyn jetkizdi.
– «Qańtar oqiǵasynan» keiin men kek alýǵa nemese jikshildik jasaýǵa umtylmaimyn. El Prezidenti retinde Qazaqstan azamattarynyń jikke bólinýin emes, birigýin asa mańyzdy basymdyq sanaimyn. Sondyqtan Jańa Qazaqstan tujyrymdamasyn usyndym. Bul qujat etnosaralyq kelisim men kópvektorly syrtqy saiasat siiaqty aiqyn jetistikterimizden bas tartpai, ótken kezeńde jiberilgen ádiletsizdikterden qutylýǵa negizdelgen. Meniń jasampaz jurtym bul synaqtan burynǵydan da kúshti, berekeli, bolashaǵynan úmit kútetin jáne óz memlekettiligin, egemendigin jáne aýmaqtyq tutastyǵyn saqtaýǵa belin bekem býǵan halyq bolyp shyǵady, – dedi Qasym-Jomart Toqaev.
Qazaqstan Prezidenti halyqaralyq seriktesterin elimiz bastan ótkerip otyrǵan osyndai syn saǵatta Qazaqstanǵa degen berik yntymaqtastyǵyn tanytýǵa shaqyrdy.
– Meniń Ákimshiligim óz tarapynan aýqymdy saiasi jáne ekonomikalyq reformalardy júzege asyrady, investitsiialyq kelisim-sharttarǵa qol suǵylmaýyn qamtamasyz etedi jáne sybailas jemqorlyqpen toqtaýsyz kúresedi. Sizderdi pandemiiadan keiingi kezeńde ózderińizdiń diplomatiialyq jáne saiasi mol tájiribelerińizdi ekijaqty qatynastarymyzdy jańa biikke kóterý úshin paidalanýǵa shaqyramyn. Qazaqstan sizderdiń memleketterińizben aradaǵy ekijaqty jáne kópjaqty bailanystardy odan ári jan-jaqty nyǵaitýǵa daiyn, – dedi Memleket basshysy.
Prezident Mońǵoliia elshisine eki memlekettiń tarihi jaqyndyǵy jóninde aityp, Monǵoliia men Qazaqstannyń Shyǵys Aziiadaǵy mańyzdy seriktesiniń biri ekenine nazar aýdardy.
– Jaqyn kórshi bolǵandyqtan jáne ortaq qundylyqtarymyzǵa mán bere otyryp, ózara yqpaldastyqty, ásirese saýda-ekonomikalyq salada keńeitýge zor múmkindik bar ekenin aitqym keledi. Budan bólek azamattarymyzdyń arasyndaǵy qatynastar da mańyzdy ról atqarady. Mońǵoliiada turatyn júz myńnan astam etnikalyq qazaq – halyqtarymyz arasyndaǵy dostyqtyń altyn kópiri, – dedi Qasym-Jomart Toqaev.
Memleket basshysy Grekiiamen aradaǵy yntymaqtastyqtyń udaiy keńeiip kele jatqanyn atap ótip, bul el Qazaqstannyń Eýropa Odaǵyndaǵy jáne Jerorta teńizi aýmaǵyndaǵy mańyzdy seriktesi ekenine toqtaldy.
– Qazaqstandaǵy on myńdaǵan grek diasporasy bizdiń halyqtarymyz arasyndaǵy máńgilik dostyq pen ózara tiimdi is-qimyldyń simvoly sanalady. Biz, ásirese aýyl sharýashylyǵy, týrizm jáne qurylys salalaryndaǵy jańa múmkindikterdi paidalanamyz dep úmittenemin, – dedi Prezident.
Memleket basshysy Indoneziiamen tyǵyz qarym-qatynasty damytý Qazaqstannyń Ontústik-Shyǵys Aziiadaǵy syrtqy saiasatynyń ajyramas bóligi ekenin aitty.
– Biz ekijaqty jáne kópjaqty negizde ortaq múddeleri bar seriktespiz. Eýraziialyq ekonomikalyq odaqqa múshe bolýymen qatar «Bir beldeý, bir jol» bastamasyndaǵy Qazaqstannyń negizgi róli ASEAN elderimen, sonyń ishinde Indoneziiamen yntymaqtastyqty nyǵaitý úshin jańa múmkindikterge jol ashady, – dedi Prezident.
Memleket basshysy Marokkomen qarym-qatynastar týraly aita kele, bul elmen aradaǵy yntymaqtastyqty damytý Qazaqstannyń Batys Afrikadaǵy startegiialyq basym baǵyttarynyń biri ekenin atap ótti.
– Biz investitsiialyq bastamalardy júzege asyrý jáne ekijaqty saýda-sattyqty keńeitý úshin Marokkomen ózara kúsh biriktirýge daiynbyz, – dedi Prezident.
Qasym-Jomart Toqaev Kanadanyń Batys jarty shardaǵy Qazaqstannyń senimdi ári jaqyn seriktesi ekenine erekshe toqtalyp, saýda-ekonomikalyq, investitsiialyq salalardaǵy, óńirlik jáne halyqaralyq qaýipsizdikti, zań ústemdigi men adam quqyqtaryn qamtamasyz etý isindegi tabysty yntymaqtastyqty atap ótti.
– Qazaqstan men Kanada – halqy az bolǵanymen, iri memleketter. Bizdiń ulttyq bailanystardy damytý jáne óńirlik teńgerimdilikti qamtamasyz etý jónindegi mindetterimiz ortaq. Men taý-ken óndirý jáne aýyr ónerkásip, aýyl sharýashylyǵy men jańartylatyn energiia kózderi, infraqurylym jáne aqyldy qalalar, aqparattyq tehnologiialar men aeroǵarysh salalarynda kóptegen múmkindikter bar ekenin bilemin, – dedi Prezident.
Qazaqstan Prezidenti Izrail elshisine eki eldiń berik adami bailanystarǵa, jan-jaqty yntymaqtastyqqa, ortaq qunydylyqtar men ózara múddelerge negizdelgen jaqsy qarym-qatynastardy turaqty saqtap kele jatqanyn atap ótti.
– Barlyq deńgeidegi qarqyndy is-qimyldar, sonyń ishinde Saýda-ekonomikalyq yntymaqtastyq jónindegi úkimetaralyq komissiiadaǵy yqpaldastyq, seriktestigimizge jańa múmkindikter ashyp, ózara igilimizge qyzmet etedi. Qazaqstan sizdiń elmen aradaǵy jan-jaqty qarym-qatynastardy odan ári keńeitýge, ásirese bilim berý, ónerkásiptik óndiris, joǵary tehnologiialar jáne basqa da salalardaǵy bailanystardy nyǵaitýǵa nietti, – dedi Memleket basshysy.
Qasym-Jomart Toqaev Majarstanmen arada berik tarihi-mádeni bailanystarǵa, sondai-aq ortaq qundylyqtar men múddelerge negizdelgen shynaiy strategiialyq seriktestiktiń ornaǵanyn rizashylyqpen atap ótti.
– Bizdiń elderimiz qarqyndy damyp kele jatqan eki naryqtyń ortasynda óte tiimdi ornalasqan. Atap aitqanda, aýmaǵymyz bir jaǵynan, Eýraziia aimaǵyn, ekinshi jaǵynan Eýropa odaǵyn qamtidy. Munyń bizge paidasy zor. Osynyń arqasynda bizdiń kásiporyndarymyzǵa ártúrli sala boiynsha yntymaqtastyq ornatý úshin mol múmkindikterge jol ashylady. Búginde energetika, kólik jáne logistika, farmatsevtika jáne tamaq ónerkásibi salalarynda jemisti qarym-qatynas jasap kelemiz. Biz aýyl sharýashylyǵy, «jasyl» ekonomika, atom energetikasy, ornyqty ónerkásip, tsifrlandyrý jáne qarjy salalaryndaǵy bailanystarymyzdy keńeitýge niettimiz, – dedi Memleket basshysy.
Jiyn sońynda Qazaqstan Prezidenti diplomattarǵa tabys tilep, olardyń memleketteriniń basshylaryna júrekjardy sálemin joldady.
