Prezident Qasym-Jomart Toqaev Izraildiń jańadan sailanǵan Premer-Ministri Naftali Bennetke quttyqtaý jedelhatyn joldady, dep habarlaidy Aqorda.
Qasym-Jomart Toqaev Naftali Bennettiń Izrail Memleketiniń Premer-Ministri bolyp sailanýyna bailanysty Qazaqstan halqynyń jáne jeke óz atynan quttyqtaý jedelhatyn joldady.
«Qazirgi ýaqytta Izrail álemdik deńgeide ekonomikasy qarqyndy damyǵan, úzdik innovatsiialyq tehnologiiasy arqyly halqynyń ál-aýqatyn arttyrǵan halyqaralyq qaýymdastyqtyń bedeldi múshesi retinde tanyldy. Osy rette elińizdiń jetistikteri men mereiin ári qarai eseleýge baǵyttalǵan Sizdiń bastamalaryńyz ben josparlaryńyzdyń tolyq ta tabysty júzege asýyna tilektespin» delingen jedelhatta.
Memleket basshysy Qazaqstan men Izrail arasyndaǵy saiasi, saýda-ekonomikalyq jáne mádeni salalardaǵy ózara tiimdi bailanystardy dástúrli dostyq pen ózara senim rýhynda nyǵaitýdy ortaq maqsat dep sanaidy.
Sondai-aq osy igilikti jolda kúsh-jiger jumyldyrýǵa daiyn ekenin jetkizdi.
Qasym-Jomart Toqaev Naftali Bennettiń jaýapty qyzmetine mol tabys pen sáttilik, al dostas Izrail halqyna baq-bereke tiledi.
