Foto: Aqordanyń baspasóz qyzmeti
Memleket basshysynyń Italiiaǵa resmi sapary Prezident Serdjo Mattarellamen kezdesýden bastaldy, dep habarlaidy "Ult aqparat" Aqordanyń baspasóz qyzmetine silteme jasap.
Eki el basshylarynyń kelissózine deiin Kvirinale saraiynda Qazaqstan Prezidentin saltanatty qarsy alý rásimi ótti. Qasym-Jomart Toqaevtyń qurmetine Qazaqstan týy kóterilip, qos memlekettiń ánurandary shyrqaldy. Qurmet qaraýyly bastyǵynyń raportynan keiin prezidentter bir-birine resmi delegatsiia ókilderin tanystyrdy.
Qasym-Jomart Toqaev óz sózinde bul Qazaqstan Prezidenti retinde Italiiaǵa jasaǵan alǵashqy sapary ekenin atap ótip, qonaqjailyq kórsetkeni úshin Serdjo Mattarellaǵa alǵys aitty. Memleket basshysy elimizdiń Eýropa Odaǵyndaǵy senimdi seriktesteriniń biri – Italiia Respýblikasymen qarym-qatynasy uzaq ýaqyttan beri ózara tiimdi sipatta damyp kele jatqanyn jetkizdi.
– Men búgin ózara múddeni kózdeitin máselelerdi, atap aitqanda, ekonomikalyq bailanystardy damytý jáne eki eldi órkendetýge baǵyttalǵan qatynastardy nyǵaitý, sondai-aq halyqaralyq ózekti máselelerdi sheshý joldaryn talqylaǵym keledi, – dedi Prezident.
Qasym-Jomart Toqaevtyń aitýynsha, Italiia Qazaqstannyń Eýropadaǵy negizgi saýda seriktesteriniń biri.
– Ózara saýda-sattyq kólemi 14,5 milliard dollardan asty. Taiaý jyldary elderimiz arasyndaǵy taýar ainalymy 20 milliard dollarǵa jetedi dep senemiz. Italiia – Qazaqstan ekonomikasyna qarjy salǵan basty investorlardyń biri. Bizdiń naryqta 300-ge jýyq italiialyq kompaniia jumys isteidi, sonyń ishinde ENI kásiporny da bar. ENI – kóshbasshy kompaniia. Biz ekijaqty qatynastardaǵy jetistikterdi joǵary baǵalaimyz. Biz olardyń jumys isteýi úshin qolaily jaǵdai jasaýdy odan ári jalǵastyra beremiz. Degenmen ekonomika baǵytyna ǵana emes, mádeniet, týrizm siiaqty basqa da kóptegen saladaǵy yntymaqtastyqty damytýǵa tyń serpin berý qajet. Qazaqstan men Italiia arasyndaǵy yntymaqtastyq óte tabysty bolatynyna senimdimin, – dedi Prezident.
Sonymen qatar Qasym-Jomart Toqaev sheteldik investorlar úshin el ekonomikasynyń anaǵurlym tartymdy jáne perspektivti salalary, onyń ishinde «jasyl» energetika týraly egjei-tegjeili málimet berdi.
Memleketter basshylary Qazaqstan men Italiianyń álemdik arenadaǵy, onyń ishinde BUU men EQYU aiasyndaǵy ózara is-qimyl máselelerine arnaiy toqtaldy.
Eki el prezidentteri BUU Jarǵysynyń qaǵidattaryn qurmetteý negizinde halyqaralyq qatynastar men jahandyq qaýipsizdik júiesin nyǵaitýdyń mańyzdy ekenin atap ótti.
Sonymen qatar taraptar Qazaqstan men Ortalyq Aziianyń Eýropa Odaǵymen aradaǵy yntymaqtastyǵyn damytý perspektivalaryn talqylap, kólik jáne logistika salasyndaǵy ózara tiimdi yqpaldastyqtyń, atap aitqanda, Transkaspii halyqaralyq kólik baǵytyn órkendetýdiń keleshegi zor ekenin erekshe atap ótti.
Memleket basshysy oraily sátti paidalana otyryp, Prezident Mattarellany Italiianyń «Úlken jetilikke» tóraǵalyq qyzmetine kirisýimen quttyqtap, G7-niń kún tártibin júzege asyrý isinde tabys tiledi.
Óz kezeginde, Serdjo Mattarella Italiia Qazaqstanda júrgizilip jatqan saiasi jáne qoǵamdyq reformalarǵa úlken qyzyǵýshylyq tanytyp otyrǵanyn atap ótip, Rimge saparmen kelgeni úshin Qazaqstan Prezidentine alǵys aitty. Sondai-aq búgingi kelissózderdiń nátijesi ekijaqty ekonomikalyq, saiasi jáne mádeni-gýmanitarlyq bailanystarǵa tyń serpin beredi dep senim bildirdi.
Dostyq ráýishte ótken kezdesý sońynda Qasym-Jomart Toqaev Serdjo Mattarellany Qazaqstanǵa saparmen kelýge shaqyrdy. Italiia Prezidenti Memleket basshysynyń shaqyrýyn rizashylyqpen qabyl aldy. Munan soń kelissóz dastarqan basynda jalǵasty.
