Iri kompaniialar jol salý tenderlerin utyp alyp, jumysty merdigerge ysyra salady. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
"Taǵy bir mańyzdy másele – memlekettik satyp alý konkýrsyn ótkizý. 2019 jyldan beri avtojol salasynda quny 1,5 trillion teńge bolatyn memlekettik kelisim-sharttar jasaldy. Sonyń 40 paiyzyn sheteldikterdiń qatysy bar kompaniialar utyp alǵan. Biz sheteldik seriktesterimizge qoldaý kórsetemiz. Olar úshin naryq árdaiym ashyq bolady. Biraq otandyq kompaniialarymyz belsene qatyspaidy" - dedi Prezident.
Memleket basshysynyń aitýynsha, Úkimet jergilikti kásiporyndar úshin básekeli orta qalyptastyrýy kerek.
"Keibir iri kompaniialardyń eńbek jáne materialdyq resýrstary jetkiliksiz. Soǵan qaramastan, olar tenderdi utyp alyp, jumysty merdigerge ysyra salady. Osyndai ahýal jylda qaitalanady. Tipti, jumystyń 100 paiyzy basqa merdigerge tapsyrylǵany jóninde málimetter bar. Mysaly, Qaraǵandy-Balqash avtojolyn (363 shaqyrym) jóndeý jumystary 2019 jyldan beri jalǵasyp keledi. Bul jobanyń jalpy quny – 248 milliard teńge. Bas merdigeri osy jumysty basqa kompaniiaǵa tapsyrdy. Al, bul kompaniia barlyq jumysty qosalqy merdigerge ysyra salǵan. Tipti, 22 paiyz kólemindegi ústeme aqysyn da ustap qalǵan" - dedi Toqaev.
