Qasym-Jomart Toqaev «Aqorda» rezidentsiiasynda «Astana Club» halyqaralyq pikirtalas alańyna qatysý úshin Nur-Sultan qalasyna kelgen Iran Islam Respýblikasynyń Syrtqy ister ministri Muhammed Djavad Zarifti qabyldady.
Taraptar ekijaqty yntymaqtastyqtyń qazirgi ahýaly men perspektivasyn, sondai-aq, óńirlik jáne halyqaralyq kún tártibindegi ózekti máselelerdi talqylady.
Memleket basshysy biylǵy qazan aiynda Erevanda ótken Joǵary Eýraziialyq ekonomikalyq keńes aiasynda Prezident Hasan Rýhanimen tabysty kelissóz júrgizgenin aitty. Qazaqstan Prezidenti irandyq áriptesiniń Nur-Sultan qalasyna ózine yńǵaily ýaqytta saparmen kelýin kútetinin jetkizdi.
Muhammed Djavad Zarif Qasym-Jomart Toqaevqa Qazaqstan astanasynda ózine kórsetilgen qonaqjailylyq úshin alǵys aitty.
Irannyń Syrtqy ister ministri «Astana Club» jumysynan alǵan áserimen bólise otyryp, Qazaqstannyń Tuńǵysh Prezidenti Nursultan Nazarbaevtyń forýmnyń plenarlyq otyrysyndaǵy baiandamasyn jáne jiynnyń syndarly atmosferasyn joǵary baǵalady.
