Prezident Qasym-Jomart Toqaev Iran Islam Respýblikasynyń prezidenti Ibrahim Raisige kóńil aitý jedelhatyn joldady, - dep habarlaidy "Ult aqparat" Aqordaǵa silteme jasap.
Jedelhatta Qazaqstan Prezidenti Irannyń Shiraz qalasyndaǵy Shahcheraǵ ǵibadathanasynda bolǵan lańkestik árekettiń saldarynan kóptegen azamattyń qaza tapqany jáne jaraqat alǵany týraly sýyt habardy tereń kúizelispen qabyl alǵanyn jetkizdi.
"Osyndai aýyr sátte qaiǵy-qasiretterińizge ortaqtasyp, barsha qazaqstandyqtardyń jáne jeke óz atymnan Sizge, jaqyndarynan aiyrylǵandarǵa, sondai-aq búkil Iran halqyna kóńil aitamyn", – dep jazylǵan Memleket basshysynyń kóńil aitý hatynda.
Qasym-Jomart Toqaev baqilyq bolǵandardyń jany jánnatta bolýyna, zardap shekkenderdiń tezirek saýyǵyp, otbasylaryna oralýyna tilektestik bildirdi.
