Qasym-Jomart Toqaev Tegeranǵa resmi sapary barysynda Iran Islam Respýblikasynyń Prezidenti Ibrahim Raisimen shaǵyn quramda kelissóz júrgizdi, dep habarlaidy "Ult aqparat" Aqordaǵa silteme jasap.
Kelissózge deiin «Saadabad» kesheninde Memleket basshysyn saltanatty túrde resmi qarsy alý rásimi ótti. Qurmet Qaraýylynyń bastyǵy eki el basshylaryna raport berip, Qazaqstan men Irannyń ánurandary shyrqalǵannan keiin Qasym-Jomart Toqaev pen Ibrahim Raisi «Djýmhýriia» saraiyna kelip, bir-birine resmi delegatsiialardyń quramyn tanystyrdy.
Saltanatty rásimnen keiin shaǵyn quramda kezdesý ótti. Qasym-Jomart Toqaev resmi saparmen kelýge shaqyrǵany úshin Ibrahim Raisige rizashylyǵyn bildirdi.
– Eń aldymen, bizdi ystyq yqylaspen qarsy alǵandaryńyz úshin alǵys aitamyn. Sizdiń shaqyrýyńyzdy zor rizashylyqpen qabyldadym. Prezident retinde Iran eline alǵash ret kelip otyrmyn. Men úshin bul sapardyń mańyzy erekshe. Búgingi kelissózderimiz eki eldiń yntymaqtastyǵyn damytýǵa tyń serpin beredi dep senemin. Qazaqta «Kórshi aqysy – táńir haqysy» degen sóz bar. Biz – kórshimen árqashan tatý bolǵan elmiz. Iran – Kaspii jaǵasyndaǵy jaqyn kórshimiz, senimdi seriktesimiz, – dedi Qazaqstan Prezidenti.
Memleket basshysy elderimiz arasynda diplomatiialyq qatynas ornaǵanyna biyl 30 jyl tolǵanyn atap ótti. Prezidenttiń aitýynsha, osy kezeń ishinde yntymaǵymyz artyp, dostyǵymyz nyǵaia tústi.
– Jan-jaqty bailanysymyz qarqyndy damyp kele jatyr. Buǵan ózara senimge negizdelgen saiasi dialogtyń arqasynda qol jetkizip otyrmyz. Bizdiń úkimetaralyq, parlamentaralyq jáne iskerlik keńesterimiz bar. Saýda-ekonomikalyq yntymaqtastyǵymyz kedergilerge qaramastan, jyldan-jylǵa artyp keledi. Biylǵy birinshi toqsanda saýda-sattyq 50 paiyzǵa artty. Endigi maqsat – osy qarqyndy toqtatpai, barynsha kóbeitý. Oǵan bizdiń áleýetimiz jetedi. Men sizdiń ózara seriktestikti damytýǵa qosqan úlesińizdi joǵary baǵalaimyn. Qarym-qatynasymyzdy damytýǵa bar kúsh-jigerimdi jumsaýǵa ázirmin, – dedi Memleket basshysy.
Qasym-Jomart Toqaev osy saparynyń aiasynda mańyzdy sheshimin jariialaýǵa uiǵarym jasaǵanyn aitty.
– Biz Iran azamattarynyń Qazaqstanda 14 kún vizasyz júrip-turýyna ruqsat beremiz. Bul túrli saladaǵy yntymaqtastyqty nyǵaitýǵa septigin tigizedi. Sondai-aq, isker top ókilderiniń bailanysyn jandandyrady. Barys-keliske tyń serpin berip, týristerdiń kóptep kelýine yqpal etedi. Iran kásipkerleri osy jeńildikti keńinen qoldanatynyna senimdimin, – dedi Qazaqstan Prezidenti.
Iran Islam Respýblikasynyń Prezidenti Ibrahim Raisi Qasym-Jomart Toqaevqa iltipat kórsetip, shaqyrýyn qabyl alǵany úshin alǵys aitty.
– Biz alǵash ret Dýshanbe sammitinde kezdesken edik. Sizben ekinshi ret Tegeranda júzdesip otyrǵanyma qýanyshtymyn. Sizdiń Prezident retinde kelgen bul saparyńyz ekijaqty qarym-qatynastarymyzdyń damýyna tyń serpin beretin uly betburys bolaryna senimdimin, – dedi Iran Prezidenti.
