Foto: Akorda.kz
Qasym-Jomart Toqaev HMS Bergbau AG kompaniiasynyń basqarma tóraǵasy Dennis Shvindti qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda Memleket basshysy Qazaqstannyń sheteldik investorlardy qoldaitynyn jáne jobalardy tabysty iske asyrý úshin qolaily jaǵdai jasaitynyn atap ótti.
Prezident álemniń damyǵan elderiniń ekonomikasy tarapynan litiige suranys artyp kele jatqanyna nazar aýdaryp, sirek kezdesetin metaldardy óndirý jáne qaita óńdeý yntymaqtastyqty damytýdyń asa mańyzdy baǵyttarynyń biri ekenin aitty.
Memleket basshysy taý-ken óndirý ónerkásibine qolaily retteý ekojúiesin qalyptastyrý úshin Qazaqstan bar kúsh-jigerin jumsaitynyn jetkizdi.
Óz kezeginde HMS Bergbau AG basshysy Shyǵys Qazaqstan oblysynda litii óndiretin jáne ony qaita óńdeitin ken baiytý kombinatyn salý jobasyn tanystyrdy. Onyń aitýynsha, josparlanǵan investitsiianyń jalpy somasy – 500 million dollar.
Qasym-Jomart Toqaev mundai investitsiialyq jobalardyń el ekonomikasy men onyń álemdik arenadaǵy básekege qabilettiligin qoldaý úshin mańyzdy ekenin atap ótti.
HMS Bergbau AG – Germaniiadaǵy qatty paidaly qazbalardy barlaýmen jáne óndirýmen ainalysatyn jetekshi táýelsiz kompaniialardyń biri. Bul kompaniia AQSh, Singapýr, OAR, Indoneziia, Polsha, BAÁ, Botsvana memleketterinde shikizat óndirý jumystaryn belsendi júrgizedi. Sondai-aq onyń Qytaida, Úndistanda, Keniiada, Malaiziiada, Pákistanda, Shri-Lankada, Bangladeshte jáne Vetnamda ókildikteri bar.
