Foto: Akorda.kz
Qasym-Jomart Toqaev Heriot-Watt ýniversitetiniń Aqtóbe qalasyndaǵy filialyn aralap kórdi, dep habarlaidy "Ult aqparat" Aqordanyń baspasóz qyzmetine silteme jasap.
Aqtóbe oblysyna jumys sapary aiasynda Prezident joǵary oqý ornynyń bilim berý jáne ǵylymi-zertteý jumystarymen tanysty. Bilim ordasynda elimizdiń 9 óńirinen kelgen 300 stýdent oqyp jatyr. Olardyń 35 paiyzy aýyl mektepteriniń túlegi, al 42 paiyzy áleýmettik jaǵdaiy tómen sanattaǵy otbasylardyń balalary.
Bul filial Memleket basshysynyń joǵary bilim berý júiesin qaita qurý jónindegi tapsyrmasyn oryndaý maqsatynda Qudaibergen Jubanov atyndaǵy Aqtóbe óńirlik ýniversitetiniń bazasynda ashylǵan.
Prezidentke berilgen málimetke sáikes elektr energetikasy, munai injeneriiasy jáne energetikalyq menedjment, kompiýterlik injeneriia mamandyqtary boiynsha kadr daiarlaý isi aǵylshyn tilinde júrgiziledi.
Memleket basshysyna stýdentterdiń Heriot-Watt ýniversitetiniń Malaiziiadaǵy, Birikken Arab Ámirlikterindegi, Shotlandiiadaǵy filialdarynda bilimin jalǵastyrý múmkindigi bar ekeni jóninde málimet berildi. Filial túlekteri Heriot-Watt University men Qudaibergen Jubanov atyndaǵy Aqtóbe óńirlik ýniversitetiniń diplomdaryn birge alady.
Ǵylymi jetistikterge arnalǵan kórmeni aralaý barysynda Prezidentke joǵary oqý orny ǵalymdarynyń jaratylystaný, tehnikalyq jáne gýmanitarlyq ǵylymdar salasyndaǵy ázirlemeleri tanystyryldy.
