Germaniia tarapynyń bastamasymen Memleket basshysy Qasym-Jomart Toqaev Germaniianyń Federaldy Prezidenti Frank-Valter Shtainmaiermen telefon arqyly sóilesti, - dep habarlaidy "Ult aqparat" Aqordaǵa silteme jasap.
Memleket basshylary Ýkrainadaǵy ahýal jóninde jan-jaqty pikir almasty.
Frank-Valter Shtainmaier Resei basshylyǵynyń Ýkrainaǵa qarsy áskeri is-qimyl bastaý jónindegi kútpegen sheshiminiń sebepterine qatysty Eýropa odaǵynyń belgili ustanymyn jetkizdi. Áskeri is-qimyldar bul eldi gýmanitarlyq apatqa alyp keldi.
Qasym-Jomart Toqaev búkil memlekettiń BUU Jarǵysyndaǵy normalar men qaǵidattardy berik ustanýǵa tiis ekenin aitty.
Prezident Ýkraina daǵdarysyn óte aýyr dep sanaidy. Sondyqtan beibit turǵyndardyń budan bylai japa shekpeýi jáne Ýkraina aýmaǵyndaǵy azamattyq infraqurylymnyń tolyq qiraýyna jol bermeý úshin qaqtyǵysty beibit jolmen sheshýdiń jańa diplomatiialyq múmkindikterin qarastyrý kerek.
Qasym-Jomart Toqaevtyń aitýynsha, Qazaqstan Ýkraina halqyna dári-dármek jáne basqa da qajetti azyq-túlik jaǵynan gýmanitarlyq kómek kórsetýge daiyn. Qazirgi ýaqytta olardy kózdelgen jerge kólikpen jetkizý joldary qarastyrylyp jatyr.
Sonymen qatar Qazaqstan Úkimeti 435 azamatymyzdy óz Otanyna jáne 650-den astam adamdy Eýropa elderine evakýatsiialaýǵa qol ushyn berdi.
Prezidentter Ýkraina problemasy boiynsha ózara bailanys jasap turýǵa kelisti.
Qasym-Jomart Toqaev pen Frank-Valter Shtainmaier eki eldiń qarym-qatynastary turaqty túrde ilgerilep kele jatqanyna nazar aýdardy. Buǵan Qazaqstan Prezidentiniń 2019 jyly jeltoqsanda Germaniiaǵa jasaǵan resmi sapary septigin tigizdi.
Memleketimizdiń basshysy Germaniia Prezidentin ózine yńǵaily ýaqytta Qazaqstanǵa saparmen kelýge shaqyrdy. Frank-Valter Shtainmaier shaqyrýdy rizashylyqpen qabyl aldy.
