Foto: Akorda.kz
Memleket basshysy Halyqaralyq fýtbol federatsiiasynyń prezidenti Djanni Infantinony qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Qazaqstan fýtbolynyń áleýetin arttyrý, sondai-aq balalar men jasóspirimder sportyn damytý máseleleri talqylandy.
Qasym-Jomart Toqaev Djanni Infantinony FIFA prezidenti laýazymyna qaita sailanýymen quttyqtap, búkil álemde, sondai-aq elimizde fýtboldyń damýyna qosqan ólsheýsiz úlesi úshin alǵys aitty.
Memleket basshysy FIFA-men aradaǵy yntymaqtastyqty keńeitý perspektivasyna joǵary baǵa berdi.
"Sizdiń saparyńyz Qazaqstan fýtbolyn damytý turǵysynan óte mańyzdy dep sanaimyn. Álemde eń tanymal sport sanalatyn fýtboldy damytýda aýqymdy is atqaryp jatqanyńyzdy bilemin. Sizdiń eńbegińizdi qurmetteimiz jáne FIFA prezidenti retinde qoldaimyz. Biz FIFA-men jáne jeke ózińizben yntymaqtastyqty nyǵaita túsýge daiynbyz", - dedi Qasym-Jomart Toqaev.
Memleket basshysynyń aitýynsha, Qazaqstanda 1 millionnan astam adam fýtbolmen júieli túrde shuǵyldanady. Búginde elimizdiń barlyq aimaǵynda 17 fýtbol ortalyǵy jáne 2 akademiia jumys isteidi. Onda 7 myńnan astam bala jattyǵady.
Djanni Infintino FIFA-nyń úzdik halyqaralyq tájiribesin bólisýge jáne Qazaqstandaǵy fýtboldyń damýyna atsalysýǵa daiyn ekenin aitty.
"Elińizge birneshe ret kelgenmin, biraq FIFA prezidenti retinde alǵash ret kelip turmyn. Osy sebepke orai sizben kezdesip otyrǵanyma qýanyshtymyn. Bul tamasha eldegi árbir fýtbol jankúieri siiaqty Siz de fýtboldy unatatynyńyzdy bilemin. Biz birlese otyryp, kóptegen aýqymdy isterdi atqara alamyz. Qazaqstan tek aimaqta ǵana emes, álemdik deńgeidegi óte mańyzdy elge ainaldy. Qazaqstan – FIFA úshin senimdi seriktes. Biz birge jumys isteýmiz qajet. Sebebi osy eldegi, sondai-aq basqa elderdegi qoǵamdy fýtbol arqyly biriktirý úshin múmkindik mol", - dedi Djanni Infantino.
