Memleket basshysy Qasym-Jomart Toqaev «Habar» jáne «Habar 24» telearnalaryna bergen suhbatynda Qazaqstandaǵy oqiǵalarǵa qatysty Eýroparlament qarary jóninde pikir bildirdi, dep habarlaidy QazAqparat.
Suhbat júrgizýshisi Prezidentten bul qujat pen jalpy Eýroparlament institýtyna kózqarasyn surady.
«Institýt retinde Eýropa Parlamentine ratsionaldy túrde qaraimyn deýge bolady. Óitkeni institýttyń ózi bar. Eger adamdar oǵan múshe memleketterdiń qansha qarjy tóleitinin bilse, bul institýtqa syni kózqaras basym bolar edi. Biraq qandai jaǵdai bolsa da, pikir bildirgim kelmeidi, óitkeni bul Eýropalyq Odaqtyń sharýasy. Eger olar mundai institýtty osynsha qarajatqa ustap turý kerek dep sanasa, marhabat», - dedi Qasym-Jomart Toqaev.
Prezident bul qarardyń esh mindetti emes, usynymdyq sipatta ǵana ekenin eske saldy.
«Olar Qazaqstan boiynsha ekinshi ret qarar qabyldady, bul joly esh ádiletsiz, aldyn ala qabyldap otyr. Sondyqtan meniń bul sheshimge degen kózqarasym jaibaraqat», - dedi Toqaev.
Eske sala ketsek, Frantsiianyń Strasbýrg qalasynda Eýropa Parlamentiniń biylǵy alǵashqy plenarlyq otyrysy ótip, onda Qazaqstandaǵy qańtar oqiǵalary talqylandy. Jiynnan keiin arnaiy qarar qabyldandy. Qazaqstannyń Syrtqy ister ministrligi Eýroparlamenttiń elimizdegi jaǵdaiǵa qatysty qabyldaǵan qarary birjaqty sipatqa ie ekenin jáne obektivti emes tujyrymdarǵa negizdelgenin málimdedi.
Sonymen birge, Prezident Qazaqstandaǵy oqiǵalarǵa halyqaralyq tergeý júrgizý usynysyn qoldamaitynyn aitty.
«Qazaqstandaǵy oqiǵalarǵa halyqaralyq tergeý júrgizýge kelsek, men mundai tergeýdi júrgizý qajet dep sanamaimyn. Ózimizdiń de shamamyz jetedi. Bizde ádil, obektivti adamdar bar. Búgin de qoǵamdyq komissiialardy basqaratyn keibiriniń esimin atadym. Men de, meniń ákimshiligim de bul komissiialardy qurýǵa qatysqan joqpyz. Olardyń ózderi osyndai institýttar qurýǵa sheshim qabyldady. Olar jumys istei bersin. Óitkeni men de aqiqatty, shyndyqty bilýge múddelimin», - dedi Prezident.
