Memleket basshysy Qasym-Jomart Toqaev Eýropalyq qaita qurý jáne damý bankiniń prezidenti Odil Reno-Bassomen beinebailanys rejiminde kezdesý ótkizdi, dep habarlaidy Aqorda.
Kezdesý barysynda tranzittik tasymal, ekonomikany dekarbonizatsiialaý, qarjy sektory salalaryndaǵy birqatar investitsiialyq jobany Qazaqstanda júzege asyrýdyń perspektivalary talqylandy.
Qasym-Jomart Toqaev Eýropalyq qaita qurý jáne damý bankimen aradaǵy tiimdi ári uzaq merzimdi yntymaqtastyqtyń oń qarqynyna kóńili tolatynyn atap ótti.
– Ózara yqpaldastyq aiasynda zor nátijelerge qol jetkizdik. Qazaqstan Úkimeti men Eýropalyq qaita qurý jáne damý banki arasyndaǵy tiimdi yntymaqtastyq odan ári nyǵaia beretinine senimdimin, – dedi Memleket basshysy.
Eýropalyq qaita qurý jáne damý bankiniń basshysy Qazaqstannyń kómirtegine beitaraptyqqa qol jetkizý jóninde málimdegen maqsattary aiasyndaǵy yntymaqtastyqty damytýǵa daiyn ekenin naqtylady.
Áńgime sońynda Qasym-Jomart Toqaev Odil Reno-Bassony Qazaqstanǵa kezekti ret saparmen kelýge shaqyrdy.
