QR Prezidenti Qasym-Jomart Toqaev Eýraziialyq integratsiianyń keleshegi týraly pikir bildirdi, dep habarlaidy QazAqparat.
«Mir» telearnasyna bergen suhbatynda Prezidentke Nursultan Nazarbaevtyń biryńǵai Eýraziia ideiasyna 25 jyl tolǵany aitylyp, EAEO keleshegi týraly suraq qoiyldy.
«Qazirgi álemdegi eń tájiribeli saiasatker Nursultan Nazarbaevtyń eýraziialyq integratsiia bastamasy halyqaralyq qatynastardaǵy jahandyq syn-qaterlerge jaýap berdi. Eýraziialyq integratsiia tarihi ólshem boiynsha qalyptasý men damýdyń qarqyndy jolynan ótti. Eýraziialyq ekonomikalyq odaq aiasynda yntymaqtastyǵymyzdyń kóptegen baǵyty boiynsha oń nátijelerge qol jetkizdik. Azdaǵan jylda taýarlar men qyzmetterdiń, kapital men eńbek resýrsynyń biryńǵai naryǵy qalyptasty. Kásiporyndardyń iskerlik belsendiligi artty. Óndiristik jáne saýda birlestikteri, birikken kásiporyndar qurylyp jatyr», - dedi Memleket basshysy.
Prezident integratsiianyń klassikalyq úlgisi boiynsha qurylǵan Eýraziialyq ekonomikalyq odaqtyń ózge memleketter úshin de tartymdy bolyp kele jatqanyn aitty.
«Vetnam, Iran, Serbiiamen saýda kelisimderi bekitildi. Mysyrmen jáne Úndistanmen dál osyndai kelisim ornatý máseleleri sheshilip jatyr. Jaqynda ǵana EAEO quramyna baqylaýshy retinde Singapýr endi. Bizdiń Tuńǵysh Prezidentimizge tiesili osynaý eńbekti eskere kele, Vladimir Vladimirovich Pýtin Nursultan Ábishuly Nazarbaevqa Joǵarǵy Eýraziialyq ekonomikalyq keńestiń qurmetti tóraǵasy ataǵyn berdi. Muny keńestiń barlyq múshesi maquldady», - dep atap ótti Prezident.
Onyń aitýynsha, eýraziialyq memleketterdiń integratsiiasy bastamasynyń basty maqsaty - ekonomikalyq jańǵyrý arqyly azamattardyń ómir súrý sapasyn kóterý.
«Bizdiń ekonomikalarymyzdyń óńirlik jáne jahandyq ekonomikalyq júielerge birigýi - álemniń damyǵan elderi qataryna enýdiń basty mehanizmi. Bizdiń birlestik qatysýshylary ekonomikalyq pragmatizmge, teńdik pen ózara tabysqa negizdelgen integratsiialyq protseske jaqyn tásilderdi ustanady. Meniń túsinigimdegi Eýraziialyq ekonomikalyq odaq bolashaqta innovatsiialyq ekonomikasy, damyǵan ónerkásibi, adami kapitaldyń joǵary deńgeii bar qýatty ekonomikalyq odaqqa ainalýy tiis. Árine, bul - óte úlken maqsat jáne osyndai úlken maqsattarǵa umtylýymyz qajet», - dedi Qasym-Jomart Toqaev.
