Memleket basshysy John Deer markaly aýyl sharýashylyǵy tehnikalarynyń barlyq túrine qyzmet kórsetetin TMD-daǵy eń iri servis ortalyǵynyń jumysymen tanysty, dep habarlaidy QazAqparat Aqordaǵasilteme jasap.
Prezident oqý bólmeleri men agregattyq sheberhanasy bar aýyl sharýashylyǵy tehnikalaryn kúrdeli jóndeýden ótkizetin ortalyqty, tsifrlandyrý jáne avtomattandyrý úderisteri, zamanaýi tehnologiialar, irrigatsiia jáne kókónis sharýashylyǵy jónindegi oqý ortalyǵyn, ónim saqtaityn qoimalardy, sondai-aq, kórme alańdaryn aralap kórdi.
Jańa aýtlet qazirgi zamannyń talaptary men úrdisterine jaýap beredi. Qazaqstan boiynsha qosalqy bólshekterdiń úzdiksiz jetkizilýin qamtamasyz etedi. Sonymen qatar tehnikalardy kúrdeli jóndeý jáne qaita qalpyna keltirý múmkindikterin keńeitedi.
Qasym-Jomart Toqaev aýyl sharýashylyǵynyń elimiz úshin strategiialyq mańyzy zor sala ekenin atap ótti. Prezidenttiń aitýynsha, aldymyzda eńbek ónimdiligin arttyrý mindeti tur. Biraq zamanaýi tehnologiialardy engizbei jáne menedjmentti jaqsartpai oǵan qol jetkizý múmkin emes.
Memleket basshysy fermerler men zamanaýi tehnologiialardy meńgergen jas mamandardy oqytý jónindegi júieli jumystardy jolǵa qoiýdyń mańyzdy ekenin aitty. Bul, óz kezeginde, agrarlyq saladaǵy bilikti kadrlardyń tapshylyǵyna qatysty máseleni sheshýge septigin tigizedi.
