Memleket basshysy Mańǵystaý oblysynyń jurtshylyǵymen kezdesýinde eńbek daýlary týraly aitty, dep habarlaidy "Ult aqparat" Prezidenttiń baspasóz qyzmetine silteme jasap.
"Mańǵystaýda eńbek daýlary jii bolyp jatatyny jasyryn emes. Men bul jaǵdaidan tolyq habardarmyn. Eńbek daýlary qatań túrde zań aiasynda sheshilýge tiis. Osy mańyzdy jumysqa táýelsiz kásipodaqtar belsene atsalysýy qajet.
Óńirde bul sala barynsha qarqyndy damyp keledi. Óte durys, men muny qoldaimyn. Myqty azamattyq qoǵam qalyptastyra alsaq, budan eshkim utylmaityny anyq. Adam quqyǵyn, onyń ishinde eńbek adamynyń quqyǵyn qorǵaý árdaiym basty nazarda bolýǵa tiis", - dedi Toqaev.
Memleket basshysy eńbek daýlaryn kóshede, alańda emes, kelissóz ústeliniń basynda sheshý - jalǵyz ǵana jol ekenin eskertti.
"Mańǵystaýda osyndai jaǵdailar syndarly dialog arqyly sheshile bastaǵany quptarlyq jait. Jalpy, eńbek daýlary - jumys berýshi men jumysshynyń arasyndaǵy másele. Ony taraptardyń múmkindigin jáne múddesin muqiiat eskere otyryp, ortaq mámile arqyly sheshý – negizgi mindet...
Osy oraida, taǵy bir mańyzdy másele – eńbek qaýipsizdigi. Ótken aptada Qaraǵandy oblysyndaǵy shahtada jarylys bolyp, 5 adam qaza tapty. Birneshe adam jaralandy.
Men marqumdardyń jaqyndaryna kóńil aitamyn. Olardyń otbasylaryna tiisti kómek kórsetý týraly tapsyrma berdim. Jaraqat alǵan azamattardyń tezirek saýyǵyp ketýin tileimin", - dep tolyqtyrdy Prezident.
