Elordaǵa investitsiia tartý jumystaryn kúsheitý qajet. Bul týraly Nur-Sultan ákimdiginde ótip jatqan qalany odan ary damytý máseleleri jónindegi májiliste Memleket basshysy Qasym-Jomart Toqaev aitty, dep habarlaidy QazAqparat.
«Elordamyzdy odan ary damytý - aldymyzda turǵan negizgi mindetterdiń biri. Sondyqtan mynadai máselelerdi sheshýge basa mán berýimiz kerek: Nur-Sultan qolaily ekonomikalyq, biznes ortasy bar qala bolyp qala berýi tiis. Eń negizgi basym mindetterdiń biri - qalaǵa investitsiia tartý. Elorda barlyq ýaqytta da investitsiia tartýda kóshbasshy boldy. Solai bolyp qala berýi de tiis. Jyl saiyn qalada halyqaralyq, investitsiialyq, ekonomikalyq forýmdar ótip jatady. Bul tájiribeniń odan ary jalǵasa beretindigi aiqyn. Óitkeni, saiasi, qoǵam qairatkeri nemese investor bolsa da olar birinshi kezekte elordamyzǵa keledi. Sonymen qatar sońǵy 10 jylda alǵash ret investitsiia kóleminiń tómendeýi baiqalady», - dedi QR Prezidenti.
Osy rette Memleket basshysy QR Syrtqy ister ministri men elorda ákiminiń nazaryn investitsiia tartý kórsetkishteriniń quldyraýyna basa nazar aýdartty.
«Osylaisha, QR Syrtqy ister ministrligi men qala ákimdigine bul baǵyttaǵy jumysty kúsheitý, taiaý ýaqytta naqty nátijeler kórsetý tapsyrylady», - dedi Qasym-Jomart Toqaev.
