QR Prezidenttigine kandidat Qasym-Jomart Toqaev Respýblikalyq qoǵamdyq shtabqa kelip, qyzmetkerlermen, aktivistermen kezdesti, dep habarlaidy "Ult aqparat" partiianyń baspasóz qyzmetine silteme jasap.
«Nur Otan» partiiasy Ortalyq apparatynyń ǵimaratynda «Jumysty uiymdastyrý ortalyǵy», «Josparlaý, saraptaý, jáne monitoring ortalyǵy», «Qarjylyq qoldaý ortalyǵy», «Quqyqtyq saraptaý ortalyǵy», «Logistika jáne materialdyq qamtamasyz etý ortalyǵy», «Baspasóz ortalyǵy» jáne respýblikalyq qoǵamdyq shtabtyń «TimeQazaqstan» jastar qanatynyń jumystarymen tanysty.
Jalpy respýblikalyq qoǵamdyq shtabqa 190 adam kirgen, onyń 30-y «TimeQazaqstan» jastar qanatynyń múshesi. Jalpy el aýmaǵynda 17 aimaqtyq, 210 qalalyq jáne aýdandyq qoǵamdyq shtab jumys istep, onda 6 myńǵa jýyq adam qyzmet kórsetetin bolady. Kandidattyń 19 500 senimdi ókili anyqtalǵan.
Qasym-Jomart Toqaevqa sailaýaldy naýqannyń úgit-nasihat jumystarynyń bastalǵany jóninde jan jaqty aqparat berildi.
QR Prezidenttigine kandidat respýblikalyq jáne aimaqtyq qoǵamdyq shtab basshylarymen jáne múshelerimen keńes ótkizdi.
Jiynnyń ashylýyndaǵy sózinde Qasym-Jomart Toqaev sailaýaldy naýqannyń mańyzdylyǵyna toqtalyp, sailaý - Qazaqstannyń damýyndaǵy jańa kezeńge jol ashatynyn atap ótti.
Sailaýaldy kezeńde shtabtar men partiianyń barlyq uiymdastyrýshylyq áleýetin tiimdi paidalaný qajettigin aityp, birqatar basymdyqtardy anyqtap berdi.
– Bizdiń sailaýaldy baǵdarlamamyz sabaqtastyq, ádildik jáne órleý degen negizgi úsh qaǵidaǵa taban tireidi. Óitkeni Elbasy saiasatynyń sabaqtastyǵy ǵana elimizdiń qarqyndy damýyn qamtamasyz etedi. Azamattar úshin eń mańyzdysy – ál-aýqattyń artýy. Bizdiń ekonomikalyq jetistikterimizdi ár qazaqstandyq sezinýi tiis. Bul – ádildiktiń belgisi. Sondyqtan aldymyzǵa naqty maqsattar qoiyp otyrmyz. Oǵan qol jetkizý úshin biz úzdiksiz damyp, únemi órlep, órkendeýimiz kerek, – dedi Qasym-Jomart Toqaev.
Qasym-Jomart Toqaev sailaýaldy naýqan kezeńin jáne sailaýdy ashyq ári ádil ótkizý úshin qoldanystaǵy zańnamalardyń talaptary qatań saqtalýy qajet ekenine basa nazar aýdardy.
– «Nur Otan» partiiasy ashyq sailaý ótkizýdi jáne demokratiialyq talaptardyń qatań saqtalýyn qalaidy. El úshin taza, ashyq, ádil sailaýdyń ótkeni asa mańyzdy, - dedi QR Prezidenttigine kandidat.
Keńeste respýblikalyq qoǵamdyq shtabtyń basshysy, «Nur Otan» partiiasy Tóraǵasynyń Birinshi orynbasary Máýlen Áshimbaev Qasym-Jomart Toqaevqa elektoraldy naýqan kezindegi shtabtyń jumysy jaiynda baiandap berdi. Onyń aitýynsha, elimizdiń barlyq aimaqtarynda 227 qoǵamdyq shtab jumys isteidi. Ondaǵy barlyq is-sharalar Qazaqstannyń sailaý týraly zańnamalaryna sáikes, arnaiy júielik kestelerge jáne elektoraldy naýqannyń media-josparyna negizdelgen.
Jiyn barysynda Aqtóbe, Shyǵys Qazaqstan oblystary men Almaty qalasynyń sailaýaldy shtabynyń jetekshileri beinebailanys arqyly daiyndyqtary týraly baiandady.
Sondai aq, respýblikalyq shtab músheleri: «Qarýly Kúshterdiń ardagerleri» RQB Ortalyq keńesiniń tóraǵasy Muhtar Altynbaev, QR Parlamenti Májilisiniń depýtaty Bekbolat Tileýhan, shtabtyń jastar qanatynyń múshesi, kórkem gimnastikadan álemdik saiystarda top jarǵan belgili sportshy Anna Aliabevalar sóz sóiledi.
Respýblikalyq qoǵamdyq shtab músheleri 13 mamyrdan bastap elimizdiń barlyq óńirlerin aralap, halyqpen kezdesýler ótkizýdi josparlap otyr. Ol jiyndarda kandidattyń sailaýaldy baǵdarlamasynyń basty qaǵidalary men halyq úshin ózekti máseleler talqylanbaq.
