Sonymen qatar, Memleket basshysy jalpyulttyq referendýmǵa daiyndyq barysy týraly aityp, EQYU-nyń osy mańyzdy sharaǵa baǵa berý úshin óz missiiasyn jiberý jónindegi sheshimin qoldady.
"Referendým - elimizdegi mańyzdy saiasi ózgerister úderisiniń bastamasy. Qazaqstanda demokratiiany ilgeriletý jumystary úzdiksiz jalǵasa beredi", - dedi Prezident.
Qasym-Jomart Toqaev pen Zbignev Raý Uiymnyń áskeri-saiasi, ekonomikalyq-ekologiialyq jáne gýmanitarlyq baǵyttardaǵy yqpaldastyǵyn jan-jaqty talqylady.
Qazaqstan Prezidenti Polshamen aradaǵy ekijaqty yntymaqtastyq jóninde aita kele, osy eldi ortalyq Eýropa aimaǵyndaǵy mańyzdy seriktes retinde qarastyratynyn jetkizdi.
"2021 jyldyń qorytyndysy boiynsha ózara taýar ainalymy 12 paiyzǵa artyp, 760 million dollarǵa jetti. Ózara saýda-sattyqty ulǵaitý úshin múmkindigimiz mol", - dedi Qazaqstan kóshbasshysy.
Eýropadaǵy qaýipsizdik jáne yntymaqtastyq uiymynyń qazirgi tóraǵasy Prezident Qasym-Jomart Toqaevtyń basshylyǵymen júzege asyrylyp jatqan aýqymdy saiasi jáne ekonomikalyq reformalardy joǵary baǵalady.
"Meniń baǵalaýym boiynsha, aldaǵy referendým Konstitýtsiiaǵa ózgerister engizý, halyqtyń áleýmettik ál-aýqatyn arttyrý jáne naryqtyq reformalardy ilgeriletý jónindegi sizdiń kúsh-jigerińiz turǵysynan úlken serpilis sanalady. Aldaǵy referendým - oń ózgeristerge jol ashatyn saiasi erik-jigerdiń airyqsha belgisi. Sizdiń elińizdegi konstitýtsiialyq reformalar demokratiia, bostandyq jáne zań ústemdigi qaǵidattaryn nyǵaitýǵa baǵyttalǵanyn atap ótkim keledi", - dedi poliak diplomaty.
Zbignev Raý elimizdegi dini qaýymdastyqtar jáne azamattyq qoǵam ókilderimen ótkizgen kezdesýleri týraly málimdedi. Sondai-aq, ol ultaralyq jáne konfessiiaaralyq kelisimniń qazaqstandyq modeline joǵary baǵa berip, Qazaqstanda turatyn poliak diasporasyna turaqty qoldaý kórsetip kele jatqany úshin Qasym-Jomart Toqaevqa rizashylyǵyn bildirdi.
