Memleket basshysy Eýropadaǵy Qaýipsizdik jáne Yntymaqtastyq Uiymynyń Az ulttar isteri jónindegi joǵarǵy komissary Lamberto Zanerdi qabyldady, dep habarlaidy Aqordanyń baspasóz qyzmeti.
Kezdesý barysynda taraptar Qazaqstandaǵy qoǵamdyq-saiasi ahýal, sonyń ishinde, etnosaralyq qatynastar salasyndaǵy memlekettik saiasatty qalyptastyrý men júzege asyrý máselelerin talqylady.
Eýropadaǵy qaýipsizdik jáne yntymaqtastyq uiymynyń (EQYU) Az ulttar isteri jónindegi joǵarǵy komissary Lamberto Zaner Joǵarǵy komissar Keńsesi men Qazaqstan halqy Assambleiasynyń aǵymdaǵy jumystary jáne yntymaqtastyqtyń keleshegi týraly habardar etti.
Qasym-Jomart Toqaev 2 qyrkúiek kúni Qazaqstan halqyna arnaǵan Joldaýynda belgilengen qoǵamnyń saiasi transformatsiiasy boiynsha mindetterdiń negizinde Ulttyq qoǵamdyq senim keńesi iske kiriskenine nazar aýdardy. Áńgime barysynda memlekettiń qoǵamdyq damýyna jas azamattardy kóptep tartýǵa, olardyń belsendiligin arttyrýǵa baǵyttalǵan jastar saiasatynyń jańa qaǵidattaryna erekshe mán berildi.
Lamberto Zaner memlekettiń ult birligin nyǵaitý jáne ár túrli etnostyq toptardyń tilderin damytýǵa jasalǵan jaǵdaidy, etnosaralyq jáne dinaralyq kelisimniń qazaqstandyq modelin joǵary baǵalady.
Sondai-aq, Memleket basshysy men Joǵarǵy komissar EQYU jaýapkershilik aimaǵyndaǵy etnosaralyq qatynastar boiynsha qazirgi jaǵdai týraly pikir almasty.
