Ekonomikalyq yntymaqtastyq uiymynyń 14-sammitine qatysqan QR Prezidenti Qasym-Jomart Toqaev atalmysh uiymen yqpaldastyq Qazaqstan syrtqy saiasatynyń basym baǵyttarynyń biri ekenin atap ótti, dep habarlaidy "Ult aqparat".
Prezidenttiń pikirinshe, uiym aiasyndaǵy ózara is-qimyldyń negizi infraqurylymdyq, áleýmettik jáne mádeni baǵyttardaǵy iri jobalar bolýy kerek. Qytaimen birlesip qolǵa alynǵan Transkaspii halyqaralyq kólik baǵyty – sondai bolashaǵy zor jobalardyń biri. Atap aitqanda, 2019 jyldyń qarasha aiynda Qazaqstan, Qytai, Ázerbaijan, Grýziia jáne Túrkiiany bailanystyratyn Sian-Ystambul-Praga baǵyty boiynsha konteinerlik poiyzy júre bastady. Byltyr sáýir aiynda Sian-Izmir baǵytyndaǵy birinshi konteinerlik quram júrip ótti. Ol 7 000 shaqyrym qashyqtyqty 16 kúnde eńserdi.
– Bul – ózara yqpaldastyǵymyzdyń jaqsy úlgisi. Degenmen ornyqty damýdy qamtamasyz etý úshin áli de kóp is atqarýymyz kerek. Biyl biz Qazaqstan – Túrikmenstan – Iran temir jol baǵytynyń tolyq iske qosylýyn qamtamasyz etýge tiispiz. Basqa da jańa baǵyttar pysyqtalýda. Túrkistan men Tashkent arasyndaǵy joǵary jyldamdyqqa arnalǵan temir jol Qazaqstannyń da, Ózbekstannyń da týristik áleýetin arttyrady dep kútilýde. Bul jol ýaqytty eki saǵatqa deiin qysqartýǵa jáne eki el kásipkerleri arasyndaǵy bailanystardy jeńildetip, áleýmettik qatynastardy jaqsartýǵa múmkindik beredi, – dedi Qasym-Jomart Toqaev.
Eske sala ketsek, Qazaqstan Prezidenti Ekonomikalyq yntymaqtastyq uiymynyń 14-sammitine qatysty.
