Qasym-Jomart Toqaev «Alibaba Group» kompaniiasynyń negizin qalaýshy Djek Mamen kezdesti, dep habarlaidy "Ult aqparat" Aqordaǵa silteme jasap.
Qytailyq biznesmenmen kezdesý kezinde álemdik ekonomikadaǵy zamanaýi jáne mańyzdy máseleler, kásipkerlik pen elektrondy kommertsiiany damytý jaǵdaiy sóz boldy.
Memleket basshysy Djek Many Qytai Halyq Respýblikasynyń 70 jyldyq merekesimen jáne «Alibaba Group» kompaniiasynyń qurylǵanyna 20 jyl tolýymen quttyqtap, eki el arasyndaǵy strategiialyq áriptestikte zamanaýi tehnologiia salasy mańyzdy ról atqaratynyn aitty.
– Men sizdiń Qazaqstanǵa qoldaý kórsetem degen nietińizdi joǵary baǵalaimyn. Biz Qazaqstan men Qytaidyń arasyndaǵy tsifrlyq ekonomikany damytýǵa qatysty strategiialyq kelisim jasadyq. Osy iske sizdiń de atsalysqanyńyzdy qalaimyz,– dedi Qasym-Jomart Toqaev.
Óz kezeginde álemdegi eń aýqatty adamdardyń biri Djek Ma Qazaqstanda birneshe ret bolǵanyn, bizdiń eldiń mádenieti men adamdary erekshe áser qaldyrǵanyn jetkizdi. Ol óziniń tájiribesin qazaqstandyqtarmen bólisýge daiyn ekenin málimdedi.
«Alibaba Group» kompaniiasy direktorlar keńesiniń tóraǵasy Chjan Iýn Memleket basshysyna álemdik internet saýdanyń kóshbasshysy sanalatyn ujymnyń tarihy men qyzmeti jaiynda, qalyptasqan ózindik dástúri týraly, bolashaqtaǵy josparlary men elektrondy kommertsiiadaǵy jańa trendter haqynda baiandady.
