Memleket basshysy Qasym-Jomart Toqaev video konferentsiia rejiminde BUU Bas hatshysy Antoniý Gýterrishpen kezdesý ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Kelissóz barysynda Qazaqstannyń Birikken Ulttar Uiymymen aradaǵy yntymaqtastyǵynyń basym baǵyttary talqylandy. Pandemiiaǵa jáne klimattyń ózgerýine qarsy kúreske, sondai-aq, óńirlik qaýipsizdik pen turaqtylyqty qamtamasyz etý úshin kúsh jumyldyrýǵa erekshe nazar aýdaryldy.
Qasym-Jomart Toqaev Antoniý Gýterrishtiń BUU basshysy laýazymyna ekinshi merzimge usynǵan kandidatýrasyn Qazaqstannyń qoldaitynyn naqtylady.
Taraptar Aýǵanstandaǵy ahýalǵa bailanysty óńirlik qaýipsizdik pen turaqtylyqty qamtamasyz etý máselesin jan-jaqty qarastyrdy. Memleket basshysy Aýǵanstanǵa kórsetiletin kómekti jalǵastyrýǵa daiyn ekenin jáne sol eldegi turaqtylyqty qalpyna keltirýge baǵyttalǵan halyqaralyq is-qimyldarǵa atsalysatynyn aitty. Bul rette, BUU Bas hatshysy atalǵan úderisti ilgeriletýdegi Ortalyq Aziia memleketteriniń, sonyń ishinde Qazaqstannyń airyqsha rólin atap ótti.
Qasym-Jomart Toqaev BUU Bas hatshysyna koronavirýsqa qarsy kúres jóninde qabyldanyp jatqan sharalar, onyń ishinde, QazVac otandyq vaktsinasynyń ázirlemesi týraly málimet berdi. Sondai-aq osy jyldyń sońyna deiin halyqtyń 55 paiyzyna ekpe salý josparyn jetkizdi. Antoniý Gýterrish koronavirýs indetine qarsy qazaqstandyq vaktsinanyń ázirlemesin jáne jappai ekpe salý naýqanynyń tabysty júrgizilip jatqanyn quptady.
BUU Bas hatshysy teńizge shyǵatyn joly joq damýshy elder tobyna kiretin memleketterdiń múddesin qorǵaýǵa baǵyttalǵan Qazaqstannyń bastamasyn quptady. Bul, ásirese, pandemiia saldarynan týyndaǵan daǵdarys kezinde ózekti bolyp otyr.
Qazaqstan Prezidenti biylǵy qarasha aiynda Glazgoda ótetin SOR26 dúniejúzilik klimat konferentsiiasyna qatysýǵa nietti ekenin jetkizdi. Atalǵan jiyn barysynda 2060 jylǵa qarai Qazaqstannyń kómirteginen ada el bolýǵa qol jetkizý jónindegi jańartylǵan ulttyq sharalary jariialanady.
Antoniý Gýterrish Qazaqstannyń iadrolyq qarýǵa qarsy jahandyq máseleni ilgeriletýdegi kóshbasshylyǵyn joǵary baǵalady. Memleket basshysy BUU Bas hatshysyn Semei poligonynyń jabylǵanyna 30 jyl tolýyna orai tamyz aiynda elimizde ótkiziletin halyqaralyq konferentsiiaǵa shaqyrdy.
Áńgimelesý sońynda taraptar ortaq múddeni kózdeitin aýqymdy máseleler boiynsha jasalatyn tyǵyz bailanystardy jalǵastyrý jóninde ýaǵdalastyqqa qol jetkizdi.
