Foto: Akorda.kz
Prezident Qasym-Jomart Toqaev Respýblika kúnine orai memlekettik nagradalar men syilyqtardy saltanatty túrde tapsyrý rásiminde sóz sóiledi, dep habarlaidy Aqordanyń baspasóz qyzmeti.
"Ult aqparat" Memleket basshysy sóziniń tolyq mátinin oqyrman nazaryna usynady.
Qadirli qaýym!
Elimizdiń eń basty meiramy – Respýblika kúni qutty bolsyn! Bul – qazaqtyń memlekettilik dástúri qaita jańǵyrǵan tarihi kún. Kók túrikter dáýirinen, Altyn Orda, Qazaq handyǵy zamanynan kele jatqan eldigimiz tamyryn tapqan kún. Bul – Alash arystarynyń azattyq jolyndaǵy arpalysy aqtalǵan kún.
Halqymyzda «Egemen bolmai, el bolmas» degen sóz bar. Osydan 33 jyl buryn tarihi ádildik ornady. Qazaqstannyń Memlekettik egemendigi týraly deklaratsiia qabyldandy. Osy mańyzdy qujat jurtymyzdyń azattyq alýyna jol ashty. Shyn máninde, Egemendik deklaratsiiasyn qabyldaý ońaiǵa soqqan joq. Elimizdiń ulttyq quramy birkelki emes edi. Sol kezdegi Parlamentte, iaǵni Joǵarǵy Keńeste jáne búkil qoǵamymyzda uzaq pikirtalas, qyzý talqylaý boldy. Qujattyń ár sózin, ár babyn qorǵaýǵa týra keldi.
Álihan Bókeihan «Bostandyqqa aparatyn jalǵyz jol – ulttyq yntymaq qana» degen. El aǵalary halqymyzdyń ardaqty ulynyń bul ósietine adal boldy. Olar jaýapty sátte uiymshyldyqpen ult múddesin qorǵai bildi. Aqjoltai qujat jurtymyzdyń talap-tilegine sai jazyldy, otanshyl azamattardyń aqyl-parasatynyń arqasynda qabyldandy. Olardyń syn saǵattaǵy batyldyǵyn naǵyz erlik dep baǵalaýǵa bolady.
Biz qazir Ádiletti Qazaqstandy quryp jatyrmyz. Sondyqtan ótken zamannyń qairatkerlerine, olardyń eńbegine laiyqty, ádiletti baǵa berip otyrýymyz kerek. Azattyq jylnamasynda Salyq Zimanov, Serikbolsyn Ábdildin, Qaratai Turysov, Zinaida Fedotova, Erik Asanbaev, Ábish Kekilbaev, Ǵairat Saparǵaliev, Sultan Sartaev, Ózbekáli Jánibekov, Oljas Súleimenov, Aleksandr Kniaginin, Myrzatai Joldasbekov, Ómirbek Baigeldi, Qýanysh Sultanov, Sergei Tereshenko jáne taǵy basqa kóptegen tulǵanyń esimin qurmetpen atap ótý kerek. Elin súigen erlerdiń otanshyldyǵy jáne olardyń ult múddesine adaldyǵy árdaiym keiingi urpaqqa úlgi-ónege bolýǵa tiis. Biz tarihi ádildik jolyn berik ustanýymyz kerek. Osy oraida, tuńǵysh prezident Nursultan Ábishuly Nazarbaevtyń tarihi rólin atap ótken jón. Sebebi ol elimizdiń táýelsiz memleket atanyp, tuǵyryn bekemdeýge orasan zor eńbek sińirdi.
Ardaqty aǵaiyn!
Qazaqta «Egemen eldiń eńsesi biik» degen sóz bar. Azattyqpen birge ulttyń rýhy kóterildi. Halqymyz kóptegen tabysqa jetti. Táýelsizdik jyldaryn bizdiń halqymyz abyroimen júrip ótken dara jol deýge bolady. Osy kezeńde biz qýatty ári jaýapty memleket retinde qalyptastyq, eldigimizdiń tuǵyryn nyǵaittyq. Kók týymyz Birikken Ulttar Uiymynyń tórinde tur. Kórshi eldermen syndarly kelissóz júrgizip, shekaramyzdy birjola shegendedik. Sonyń arqasynda shynaiy dostyq shekarasy qalyptasty, sondai-aq ulttyq qaýipsizdigimizdi qamtamasyz ettik.
Memleketimizdiń jetistikterin qaperden shyǵarmai, únemi aityp júrý kerek. Óitkeni onyń bári – Qazaqstannyń shynaiy egemendiginiń jemisi. Sonymen birge, árine, qatelikter de boldy. Ony umytpaǵan jón. Qazaqstannyń turaqty damýyn qamtamasyz etý úshin odan qorytyndy jasalýǵa tiis.
Elimiz sońǵy jyldary túbegeili jańǵyrdy. Biz aýqymdy, biregei konstitýtsiialyq reforma jasadyq. Bul mańyzdy qadam bizdiń geosaiasi ortamyzdy alyp qarasaq, teńdessiz reforma boldy. Jalpyulttyq referendýmda halqymyz bul ózgeristerge barynsha qoldaý bildirdi. Azamattardyń saiasi úderiske qatysý múmkindigi aitarlyqtai artty. Memleket pen qoǵamnyń qarym-qatynasy jańa sipatqa ie boldy. Iaǵni, jalpyulttyq dialogtyń aýqymy keńeidi. Prezident jeti jylǵa bir ret qana sailanatyn boldy. Aralas sailaý júiesi engizildi. Munyń bárin saiasi reformanyń basty mazmuny deýge bolady.
Osydan týra bir jyl buryn men aýqymdy sailaý kezeńi bastalatynyn aitqan edim. Qysqa merzim ishinde Prezident, Senat pen Májilis, barlyq deńgeidegi máslihattar sailaýy kezeń-kezeńimen ótti. Onyń bári jańa ári ádil erejemen júrgizildi. Bul sailaýlar azamattarymyzdyń saiasi jáne sailaý mádenietiniń deńgeii óskenin kórsetti. Aýyl ákimderin tikelei sailaýdyń engizilýi saiasi reformadaǵy asa mańyzdy qadamnyń biri boldy. Qazirge deiin 1900-den astam aýyl okrýgynda sailaý ótti. Aýyl ákimderiniń 60 paiyzǵa jýyǵy jańardy.
Jaqynda aýdan jáne oblystyq mańyzy bar qala ákimderin azamattarymyz tikelei sailaityn bolady. Ázirge jańa tásildiń tiimdiligin baiqap kóremiz. Adam quqyǵyn qorǵaý júiesi jetile tústi. Konstitýtsiialyq Sot qaita quryldy. Ombýdsmenderdiń mártebesi kóterilip, quzyreti keńeidi. Turmystyq zorlyq-zombylyq jasaǵan adamdarǵa jaza kúsheitildi. Qazaqstan áleýmettik salada aitarlyqtai tabysqa qol jetkizdi.
Halyqtyń densaýlyǵyn jaqsartý úshin qomaqty qarjy bólinip jatyr. Sonyń nátijesinde azamattardyń ortasha jasy 74,4 jasqa jetti. Bul – el tarihyndaǵy rekordtyq kórsetkish.
Qiyndyǵy kóp bolǵan toqsanynshy jyldarda halyq sany kúrt azaidy. Biz qazirgi tańda osy demografiialyq quldyraýdy eńserdik. Kóp uzamai halqymyzdyń sany 20 millionǵa jetedi. Bul elimizdiń turaqty damýynyń aiqyn kórinisi deýge bolady.
Bir sózben aitqanda, azamattarymyz óz urpaǵynyń jarqyn bolashaǵyna jáne elimizdiń erteńine senimmen qaraidy. «Ulttyq qor – balalarǵa» bastamasyn júzege asyrý úshin tiisti zań qabyldandy. Nebári eki aidan keiin balalarymyzdyń esep-shotyna qarjy túse bastaidy.
Memlekettik saiasattaǵy mańyzdy baǵyttyń biri – aimaqtardy jan-jaqty damytý. «Qýatty aimaqtar – qýatty memleket» degenimiz – jalań uran emes. Bul – Ádiletti Qazaqstandy qurýǵa qajetti eń basty qaǵidat. Biz byltyr elimizdiń ákimshilik-aýmaqtyq qurylymyna birqatar ózgeris engizdik. Sol arqyly keibir oblystyń damýyna tyń serpin berdik. Meniń tapsyrmammen aýyl-aimaqty damytý tujyrymdamasy qabyldandy. Bul qujattyń mán-mańyzy zor. Aimaqtarda áleýmettik, injenerlik jáne kólik infraqurylymyn qurý – basty mindet.
«Aýylda densaýlyq saqtaýdy jańǵyrtý» ulttyq jobasy bastaldy. Osy jobanyń aiasynda 655 ambýlatoriia jáne feldsherlik-akýsherlik nysan salynady, qural-jabdyqpen tolyq qamtamasyz etiledi. Buǵan qosa 20 aýdanaralyq kópbeiindi emhana ashylady, al 12 emhana zaman talabyna sai jańarady. Iaǵni, tórt millionnan astam aýyl azamatyna sapaly dárigerlik qyzmet kórsetiledi.
Elimizde «Jaily mektep» jobasy qolǵa alyndy. 2026 jylǵa deiin barlyq aimaqta júzdegen jańa mektep boi kóteredi. Aýyldarda 100 sport ortalyǵy ashylady. Sondai-aq 650 mádeniet oshaǵy salynady jáne jóndeledi.
Barshańyzǵa málim, men biylǵy Joldaýymda elimizdiń Jańa ekonomikalyq baǵdaryn usyndym. Basty qaǵidattarymyz ádildik, ashyqtyq jáne shynaiy báseke bolmaq. Iaǵni, biz qazir Jańa ekonomikalyq saiasatqa jol ashyp otyrmyz. Negizgi maqsat – ult bailyǵyn ádil bólý, infraqurylymdy jedel jańǵyrtý, kásipkerlikke qoldaý kórsetý jáne elimizge aýqymdy investitsiia tartý.
Úkimet pen ákimder Memleket basshysynyń tiisti nusqaýlaryn, tapsyrmalaryn múltiksiz oryndaýǵa mindetti. Bul jumys Parlamenttiń jiti baqylaýynda bolýy kerek. Bir sózben aitqanda, ekonomikalyq ózgeristerdiń igiligin jaqyn arada elimizdiń barlyq azamaty kórýge tiis.
Qazaqstan egemen memleket retinde árdaiym ulttyq múddege sai keletin salmaqty ári syndarly syrtqy saiasat júrgizedi. Halyqaralyq qaýipsizdikti qamtamasyz etýdi kózdeitin aimaqtyq jáne jahandyq úderisterde mańyzdy ról atqarady. Biz álemdik dinderdiń bir birimen jaqyndasyp, syndarly dialog ornatýyna kúsh salamyz. Qazirgi zamanda memleketterdiń ujymdasyp kúsh jumyldyrýy jáne diplomatiiany danalyqpen ári joǵary kásibilikpen júrgizýi álemde uzaq ýaqyt boiy turaqtylyq ornaýyna, elderdiń jappai damýyna, BUU-nyń Jarǵysyna negizdelgen ádiletti halyqaralyq qatynastar júiesi qurylýyna jol ashady. Qazaqstan «eldiń ishinde de, ainalasynda da beibitshilik», «áralýandyq arqyly – birlikke» degen qaǵidattardy árdaiym berik ustanady.
Qazaqstannyń aldynda buryn-sońdy bolmaǵan jańa syn-qaterler tur. Osy kúrdeli kezeńde memleketimizdiń ornyqty damýy óte mańyzdy. Biz bolashaqqa senimmen qaraǵan birtutas Qazaq elin kúlli álemge tanytýymyz kerek. Egemendikke qol jetkizý ońai emes, al ony saqtap turý tipti qiyn. Shyn máninde, táýelsizdik – bárinen qymbat.
Táýelsizdikti saqtaý bul – eń aldymen, tutas ulttyń jaýapkershiligi. Biz egemendikti tynymsyz eńbekpen, myzǵymas birlikpen kún saiyn qorǵaýymyz kerek. Eń bastysy, elimizdegi turaqtylyqty saqtaýymyz qajet. Sebebi tynyshtyq bolmasa, basqanyń bári beker.
Álemdegi ahýaldyń qandai kúrdeli ekenin kórip otyrsyzdar. Bedeldi halyqaralyq sarapshylar Qazaqstandy beibitshiliktiń besigi dep ataidy. Qazir biz aimaqtyń mádeni-rýhani ortalyǵyna ainaldyq.
Biyl sheteldiń óner ujymdary elimizde 200-den astam mádeni is-shara ótkizdi. Bul – turaqtylyqtyń, tynyshtyqtyń aiqyn kórinisi. Muny basqalarǵa úlgi-ónege deýge bolady. Al turaqsyzdyq jailaǵan elge eshkim umtyla qoimasy anyq.
Beibitshilik – bizdiń basty bailyǵymyz. Onyń qadirine jetip, baǵalai bilý – bárimizge ortaq paryz. Muny elimizdiń árbir azamaty, ásirese, óskeleń urpaq tereń túsinýi qajet.
Qazaqstan damýdyń jańa kezeńine qadam basty. Saiasi jáne áleýmettik-ekonomikalyq reforma qoǵamdyq sananyń túbegeili ózgerisine ulasýy kerek. Men Túrkistanda ótken Quryltaida sóilegen sózimde jańa qoǵamdyq etika týraly aittym. Alqaly jiynnan soń Quryltaidyń keibir músheleri maǵan óz usynystaryn joldady. Olar elimizde qundylyqtar júiesin qalyptastyrý qajettigine nazar aýdarýda. Shyn máninde, muny óte mańyzdy bastama dep oilaimyn. Ony jan-jaqty talqylap, qarastyrýymyz kerek.
Men buǵan deiin Adal azamat uǵymyn usyndym. Osy oraida, jastarymyzǵa arnaiy úndeý joldaǵym keledi. Elimizde júzege asyrylyp jatqan árbir bastama, eń aldymen, sizderge arnalady. Qazirgi reformalardyń igiligin kóretin de, eldik isterdi jalǵastyratyn da – sizder.
Búgingi jastardy Qazaqstannyń kelbeti deýge bolady. Shyn máninde, kez kelgen memleketti turǵyndaryna qarap baǵalaidy. Iaǵni, bizdiń qandai el bolarymyz óskeleń urpaqqa bailanysty. Sondyqtan jastarymyz otanshyl, bilimpaz, eńbekqor, únemshil, ádil ári janashyr bolýy qajet. Jastar sportpen, dene shynyqtyrýmen ainalysýy kerek. Men muny únemi aityp júrmin. Osy qundylyqtardy barynsha nasihattap, taratý qajet. Sonda jeke adamnyń qasieti tutas ulttyń qasietine ainalady.
Jastar kez kelgen ózgeriske beiim bolady. Ár nárseni boiyna tez sińiredi. Men sizderdi jaqsydan úirenýge, jamannan jirenýge shaqyramyn. Uly Abai aitqan bes nárseden qashyq, bes nársege asyq bolyńyzdar. Sizder dáriptegen qundylyqtar qoǵamda tez ornyǵady. Sizder qoldaǵan ózgerister jyldam júzege asady. Bárimizdiń tilegimiz – bir, bul – qoǵamymyzda jappai ádilettik ornatý. Endeshe, maqsatymyzǵa birge jeteiik. Men jas urpaqtyń jasampazdyq qýatyna senemin. Ózderińiz siiaqty sanaly ul-qyzdary bar Qazaqstan órkeniet kóshiniń basynda bolary sózsiz.
Memlekettilik tuǵyryn nyǵaita túsý úshin zań ústemdigin ornyqtyrý óte mańyzdy. Ádiletti Qazaqstandy qurý úshin quqyqtyq mádenietti damytý qajet. Zańsyzdyq, tártipsizdik, mádenietsizdik eldi jarǵa jyǵady. Mundai jaǵymsyz úrdisterge búkil qoǵam bolyp qarsy turýymyz kerek. Al tártipke baǵynǵan qoǵam órkenietti bolady. Bul – zańdylyq. Ár azamat elimizdiń zańyn qurmettese, bereke-birlik te, baqýatty turmys ta bolady. Iaǵni, Zań tolyǵymen oryndalsa, tórt qubylamyz túgel bolmaq.
Biz birtindep qoǵamdy ózgertý jáne demokratiia qaǵidattaryn engizý jolynan ainymaimyz. Álemde saiasi jáne ekonomikalyq ahýal qubylyp turǵan zamanda zań jáne quqyq ústemdigin qamtamasyz etý óte mańyzdy. Memleket radikalizmniń, ekstremizmniń, quqyqtyq nigilizmniń jáne turmystyq vandalizmniń kez kelgen kórinisine múldem tózbeýshilik saiasatyn ustanatyn bolady.
Elimiz óktemdik pen óshpendilikke, qoǵamdyq tártipti aiaq asty etýge, zorlyq-zombylyqqa shaqyrýǵa, azamattardyń ar-namysyn taptaityn áreketter jasaýǵa jol bermeidi. Zańǵa qaishy keletin, azamattardyń arasyna iritki salatyn jáne turaqtylyqqa syna qaǵatyn kez kelgen sóz ben áreketke qatań tosqaýyl qoiady. Bul talapqa baǵynbaý memleketke de, qoǵamǵa da qarsy shyǵý dep baǵalanady. Munyń bárin, ásirese, el aldynda júrgen jáne halyqqa sózi ótimdi azamattar tereń túsinýi kerek.
Eki jylǵa da jetpeitin az ýaqytta elimizde iske asyrylǵan reformalar halyqtyń saiasi sana-sezimin edáýir ózgertti. Endi jurtymyz memleketti basqarýdyń burynǵy tásilin qaitarýǵa jol bermeitinine senimim mol. Reformalardan keiin ótkenge qaita oralmaimyz. Ózgerister áli jalǵasady jáne memleketimizdiń sipatyn tolyq ózgertedi.
Biraq biz reformany júzege asyrǵanda, eń aldymen, ishki saiasi turaqtylyqtyń mańyzdylyǵyn esten shyǵarmaýymyz kerek. Áitpese, Qazaqstannyń memlekettiligine zor qaýip-qater tónýi jáne onyń saldary ult bolashaǵy úshin óte aýyr bolýy múmkin. Sondyqtan men árbir azamat zań men tártipti saqtaýy kerek dep únemi aityp júrmin. Biz sózben de, ispen de qoǵamdy ortaq maqsatqa jumyldyrýǵa jáne jalpyulttyq birlikti nyǵaita berýge tiispiz. Halqymyz azat el bolyp, myqty ári ádiletti memleket qurý týraly armanyn bereke-birliginiń arqasynda ǵasyrlar tezinen aman alyp shyǵyp, aqiqatqa ainaldyrdy. Búginde bizdiń memlekettiligimiz qarqyndy damyǵan egemen respýblikanyń órkenietti ári quqyqtyq sipatyna ie boldy.
Qasterli táýelsizdigimizdi qorǵap, jan-jaqty nyǵaitý – bárimizdiń ortaq mindetimiz, qazirgi jáne bolashaq urpaq aldyndaǵy perzenttik paryzymyz. Biz Respýblika kúniniń mán-mańyzyn, onyń myqty memleket jáne kózi ashyq, kókiregi oiaý ult qalyptastyrýǵa baǵyttalǵan aýqymdy ózgeristerdiń simvoly retindegi tereń maǵynasyn jastarǵa túsindirýimiz kerek.
Respýblika kúni halyqtyń bolashaqqa senimin nyǵaitatyn erekshe meiram bolýy kerek. Patriottyq, qaiyrymdylyq jáne volonterlik is-sharalardy kóptep uiymdastyrǵan jón. Egemendik kúni ultty uiystyratyn naǵyz eldiktiń meiramyna ainalýǵa tiis. Iaǵni, osy qasterli merekede Otanǵa degen shynaiy súiispenshilikti dáripteýimiz kerek. Bul – barshamyzǵa ortaq is. Sondyqtan bárimiz bir el bolyp atsalysaiyq!
Qadirli qaýym!
Táýelsiz eldiń tabysyn arttyrýǵa azamattarymyz mańdai terimen úles qosyp júr. Shyn máninde, tabandy eńbek zor tabysqa jetkizedi. Barlyq salany, ásirese, óndiristi bilikti mamandar damytady. Sondyqtan biz bir el bolyp qoǵamda eńbekqorlyqty dáripteimiz. Adal eńbek pen jaýapkershilik jańa qoǵamdyq etikanyń ózegi bolýy kerek. «Eńbegine qarai – qurmeti» degen.
Eńbegimen daralanyp, kópshiliktiń qurmetine ie bolǵan azamattyń biri – kórnekti memleket jáne qoǵam qairatkeri Baqtyqoja Izmuhambetov. Ol munai-gaz salasynda, óndiriste jáne memlekettik qyzmette uzaq jyl boiy tabysty jumys istedi. Onyń ómir joly óskeleń urpaqqa ónege bolary sózsiz. Búgin men elimizge orasan zor eńbek sińirgen qairatker Baqtyqoja Salahatdinulyna «Qazaqstannyń Eńbek Eri» ataǵyn berý týraly sheshim qabyldadym.
Basqa da salada, sonyń ishinde aýyl sharýashylyǵynda ónimdi eńbek etip júrgen azamattar az emes. Osyndai naǵyz eńbek adamynyń biri – Syr eliniń azamaty Imamzada Shaǵyrtaev. Onyń aýyly da, sharýasy da kópshilikke úlgi bolyp otyr. Tabysqa jetken árbir jan óz aýylyna dál osylai qamqor bolsa, nur ústine nur bolar edi. Aimaqty damytýǵa orasan zor úles qosqan Imamzada Qýanyshbaiuly búgin «Qazaqstannyń Eńbek Eri» ataǵyna ie boldy.
Men eńbek adamyna erekshe qurmet kórsetilýi kerek dep udaiy aityp júrmin. Biyl Joldaýymdy jariialaǵan kezde Parlamentke eńbek adamdaryn arnaiy shaqyrdym. Olardyń qatarynda ustazdar da boldy. Qazir – bilimniń dáýiri. Bilimi ozyq jurt damý kóshiniń aldyna shyǵady. Bul zamanda bilimpazdyq eń basty qasiettiń birine ainalýǵa tiis. Sondyqtan bilim salasyn damytýǵa basa mán beremiz.
Muǵalimniń mártebesin kóterip, jaǵdaiyn jaqsartý óte mańyzdy. Astanada ótken Ustazdar sezinde bul máselege arnaiy toqtaldym. Óitkeni ustazdar qaýymy ulttyń jańa sapasyn qalyptastyrady. Muǵalim bolyp, urpaq tárbieleý – qasietti missiia. Elimizde myńdaǵan adam osy mindetin adal atqaryp júr. Olar kúndelikti eńbegimen Qazaqstandy damytýǵa zor úles qosýda. Sol sebepti muǵalimderdiń qoǵamdaǵy orny erekshe bolýǵa tiis. Ustazǵa barlyq jerde qurmet kórsetilýi kerek.
Birneshe jyl buryn meniń tapsyrmammen «Qazaqstannyń eńbek sińirgen ustazy» ataǵy belgilendi. Jaqynda bir top pedagogti ózim arnaiy marapattadym. Osy igi úrdis búgin de jalǵasyn tappaq.
Semei qalasyndaǵy №7 mektep-litseidiń matematika páni muǵalimi Alma Shúkejanova elý jyl boiy urpaqqa bilim men tárbieni qatar berip keledi. Búgin Alma Saidahmetqyzyn «Qazaqstannyń Eńbek Eri» ataǵymen marapattaý týraly sheshim qabyldadym.
Sondai-aq búgin basqa da birqatar muǵalim joǵary memlekettik marapatqa ie boldy. Osy arqyly men barsha ustazdar qaýymyna erekshe iltipatymdy bildiremin.
Ulttyń rýhaniiatyn damytyp, rýhyn kóterýge qalamgerlerimiz erekshe yqpal etedi. Buǵan deiin «Qazaqstannyń Halyq jazýshysy» ataǵyn qaitarý týraly bastama kóterildi. Men Túrkistanda ótken Ulttyq Quryltaidyń otyrysynda osy usynysqa qoldaý bildirdim.
Qurmetti ataq shirek ǵasyrdan soń jazýshylarymyzǵa qaita berile bastady. Tól ádebietimizdi damytýǵa zor úles qosqan bir top kórnekti qalamger búgin «Qazaqstannyń Halyq jazýshysy» atandy.
Meniń tapsyrmammen «Qazaqstannyń Halyq ártisi» ataǵy da qaitaryldy. Bul ataq burynǵydai teatr, kino, mýzyka jáne taǵy basqa óner salasynyń elimizge tanymal tarlandaryna beriledi.
Men kóktemde ótken Qazaqstan halqy Assambleiasynyń HHHII sessiiasynda el birligin jáne qoǵamdyq kelisimdi nyǵaitýǵa kóp jylǵy qajyrly eńbegimen úles qosqan azamattardy arnaýly ordenmen marapattaý týraly tapsyrma berdim. Tiisti zańdarǵa ózgerister engizilgen soń, «El birligi» ordeni bekitildi. Nagradalar qatarynan laiyqty oryn alǵan bul marapat búgin alǵash ret tapsyrylady.
Memleket elimizdiń ǵylym salasyn damytýǵa, ǵalymdarymyzdyń jetistikteri men eńbegin baǵalaýǵa airyqsha mán beredi. Biyl ál-Farabi atyndaǵy ǵylym men tehnika salasyndaǵy memlekettik syilyq Qazaqstannyń Ulttyq iadrolyq ortalyǵynyń ǵalymdar ujymyna berildi. Ortalyq atom-energetikasy salasynda teńdessiz zertteýler júrgizip, álemdik deńgeidegi ozyq ázirlemeler jasady.
Qaýip-qaterden qaimyqpai, ózgeniń ómirin qutqarý – naǵyz erlik. Mundai adamdar shynaiy qurmetke laiyq. Búgin osyndai birneshe azamatty marapattaimyn.
Jalpy, elimizdiń damýyna ár aimaqtyń turǵyndary, ár salanyń mamandary zor úles qosyp júr. Biz olarǵa árdaiym qurmet kórsetemiz.
Memlekettik marapatty, eń aldymen, halyqtyń alǵysy dep túsingen jón. Shyn máninde, týǵan eldiń yqylasynan artyq eshteńe joq. Endeshe, jurttyń rizashylyǵyn alyp, tabysty eńbek ete berińizder!
Qasterli Otanymyz órkendei bersin!
Respýblika kúni qutty bolsyn!
