Foto: Akorda.kz
Qazaqstan Prezidenti Beijińge resmi sapary aiasynda Búkilqytailyq halyq ókilderi jinalysy Turaqty komitetiniń tóraǵasy Chjao Letszimen kezdesý ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Qasym-Jomart Toqaev ǵasyrlar boiǵy dostyq pen ózara qoldaýdyń berik arqaýyna súiene otyryp, Qazaqstan men Qytai máńgilik ári jan-jaqty strategiialyq seriktestik rýhynda turaqty nyǵaiyp kele jatqan úlgili memleketaralyq yntymaqtastyqtyń negizin qalaǵanyn atap ótti.
– Eki el arasynda belsendi ári senimdi saiasi dialog ornaǵan. Úkimetter men parlamentter deńgeiinde júieli jumys júrgizilip jatyr. Byltyr elderimiz arasyndaǵy yntymaqtastyqtyń jańa «altyn 30 jyldyǵyna» qadam bastyq. Búgin Tóraǵa Si Tszinpinmen jáne Memlekettik keńestiń Premeri Li Tsianmen jan-jaqty kelissózder júrgizý barysynda ózara tiimdi yntymaqtastyqty kúsheitýge nietti ekenimizdi rastadyq. Qazirgi tańda Qytaidy Qazaqstannyń eń basty saýda seriktesteriniń jáne bizdiń ekonomikamyzdyń iri investorlarynyń biri deýge bolady. Biz elderimiz arasyndaǵy taýar ainalymyn aldaǵy ýaqytta 40 milliard dollarǵa deiin jetkizýdi kózdep otyrmyz. Jalpy Qytaidyń Ortalyq Aziia memleketterimen taýar ainalymynyń jartysy Qazaqstanǵa tiesili, – dedi Prezident.
Óz kezeginde Chjao Letszi Qasym-Jomart Toqaevqa iltipat bildire otyryp, qazaq-qytai qatynastarynyń qarqyndy damyp kele jatqanyn atap ótti. Onyń aitýynsha, Qazaqstan Prezidentiniń sapary barysynda Qytai tarapymen tabysty kelissózder júrgizildi. Sonymen qatar Búkilqytailyq halyq ókilderi jinalysy Turaqty komitetiniń tóraǵasy eki el arasyndaǵy strategiialyq seriktestik odan ári bekidi, ózara tiimdi yntymaqtastyq damidy jáne ekijaqty qatynastar jańa deńgeige kóteriledi dep senim bildirdi.
Qasym-Jomart Toqaev pen Chjao Letszi Qazaqstan men Qytaidyń parlamentaralyq qatynasynyń josparly túrde nyǵaiýyn oń baǵalady, sondai-aq keń kólemdegi ekijaqty yntymaqtastyqtyń tabysty damyp kele jatqanyn atap ótti.
