Qazaqstan prezidenti Qasym-Jomart Toqaev Bozjyra shatqalynda qonaq úi salý josparyna narazylyq bildirgen halyqtyń pikirine qulaq asty.
"Prezident Mańǵystaý oblysyndaǵy erekshe qorǵalatyn Bozjyra tabiǵat qoryǵynyń aýmaǵyna salynatyn jańa qonaq úidiń qurylysyna qatysty qoǵamnyń teris pikirin eskere otyryp, Úkimetke osy jobany qaita qaraý jóninde tapsyrma berdi", - dep jazdy memleket basshysynyń baspasóz hatshysy Berik Ýáli Facebook-tegi paraqshasyna.
Aita keteiik, qazaqstandyqtar áleýmettik jeli arqyly Bozjyrada qonaq úi salýǵa jappai narazylyq bildirdi.
Ekologiia, geologiia jáne tabiǵi resýrstar ministrligi qazaqstandyqtardyń úndeýine jaýap retinde eldiń tabiǵi bailyqtaryn túgel jáne qaýipsiz saqtaýǵa, qorshaǵan ortany qorǵaýǵa vedomstvo da múddeli ekenin málimdedi.
"Osyǵan bailanysty Mańǵystaý oblysyndaǵy Bozjyra tabiǵi aimaǵyndaǵy bul qurylys nysany qoǵamdyq tyńdaýlardan, ekologiialyq saraptamadan, onyń ishinde qorshaǵan ortaǵa áserin baǵalaýdan ótýi tiis", - dep habarlady ministrliktiń baspasóz qyzmeti.
Ministrlik qurylys erejesiniń saqtalýyna jáne jobany saraptamadan ótkizýge jergilikti atqarýshy organdar – ákimdikter jaýap beretinin atap ótti.
Bozjyra jergilikti mańyzy bar "Jabai ushqan" kishi qoryǵynyń aýmaǵynda ornalasqan.
"Jabai ushqan" kishi qoryǵy Mańǵystaý oblysy ákiminiń 2012 jylǵy qaýlysyna sáikes qurylǵan jáne Mańǵystaý oblysynyń tabiǵi resýrstar jáne tabiǵatty paidalanýdy retteý basqarmasynyń "Qyzylsai" memlekettik aimaqtyq tabiǵi parkine qaraidy.
