Foto: Akorda.kz
Memleket basshysy Qazaqstan kásipkerleriniń quqyqtaryn qorǵaý jónindegi ýákil Rýstam Júrsinovti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa atqarylǵan jumystar men otandyq biznesti odan ári qoldaý jáne kásipkerlerdiń múddesin qorǵaý jospary jóninde málimet berildi.
Rýstam Júrsinov Prezidentke 2022 jyly 4408 ótinish kelip túskenin, onyń 1530-y (34 paiyz) oń sheshimin tapqanyn jáne 1030 (23 paiyz) ótinish boiynsha túsindirý jumystary júrgizilgenin aitty. Sondai-aq byltyr biznes-ombýdsmen elimizdiń barlyq óńirinde kásipkerlermen kezdesý ótkizgen.
Ýákil ótken jyly reiderlikke qarsy kúresti kúsheitýge jáne biznesti memlekettik organdardyń zańsyz aralasýynan qorǵaýǵa qatysty túzetýler zańnamaǵa engizilgenin jetkizdi.
Sonymen qatar Prezidentke kásipkerlik qyzmet salasyna jańa retteýshi saiasatty engizý jónindegi tapsyrmalarynyń oryndalý barysy týraly baiandaldy.
Qasym-Jomart Toqaev Qazaqstan kásipkerleriniń quqyqtaryn qorǵaý jónindegi ýákildiń esebin qabyldap, bizneske qatysty ákimshilik kedergilerdi anyqtaýǵa jáne olardy joiý sharalaryn ázirleýge baǵyttalǵan birqatar tapsyrma berdi.
