Memleket basshysy pandemiiaǵa qarsy elimizdegi kúres jumystaryn úilestiretin Ortalyqtyń jumysymen tanysty, dep habarlaidy "Ult aqparat" Aqordaǵa silteme jasap.
Densaýlyq saqtaý ministrliginiń basshylyǵy Prezidentke álemde jáne Qazaqstanda koronavirýstyń taralýyna qarsy kúresti úilestirý jáne monitoring jasaý ádisteri, onyń ishinde aýyrǵandardy anyqtaý jáne esepke alý jónindegi jumystarda tsifrlyq tehnologiiany qoldaný týraly baiandady.
Qasym-Jomart Toqaev atalǵan ortalyqtyń álemdegi qolaisyz epidemiologiialyq jaǵdaiynda atqaratyn mańyzdy rólin atap ótti jáne kúsh biriktire otyryp, oqiǵanyń keri áserine tosqaýyl qoiýǵa senim bildirdi.
Prezident qazaqstandyqtardy tynyshtyq saqtaýǵa shaqyryp, Úkimetke indettiń taralýyna bailanysty qaýesetter men dúrbeleńge tosqaýyl qoiý úshin azamattardy shuǵyl ári shynaiy aqparattarmen qamtamasyz etý mindetin qoidy. Memleket basshysy osyǵan orai qoǵamǵa qazirgi ahýal men memlekettiń qabyldap jatqan sharalary týraly aqparat taratatyn resmi arnalardy aiqyndaý jóninde tapsyrma berdi.
Jalpy Qasym-Jomart Toqaev koronavirýsqa qarsy kúresý úshin qabyldanyp jatqan sharalarǵa oń baǵa berdi.
– Úkimet az jumys istegen joq. Mamandardyń baǵalaýynsha, biz Eýropa elderine qaraǵanda aitarlyqtai shuǵyl áreket etip jatyrmyz. Degenmen bizge nátije kerek. Halyq áli tolyq aqparat ala almai otyr, – dedi Memleket basshysy.
Sonymen qatar Prezident meditsinalyq betperdelerdiń tapshy ekenin aitty.
– Bizde áli kúnge deiin tiisti kólemde betperdelerdiń jetispeitindigin atap aitqym keledi. Biraq qaǵaz júzinde bári jetkilikti. Bir jaǵynan halyq dárihanalarda betperdelerdiń áli de joq ekenin aityp shaǵymdanýda. Nege? Bul alypsatarlyq dep oilaimyn, - dedi Qasym-Jomart Toqaev.
Memleket basshysy halyqty betperdelermen jedel qamtamasyz etýdi talap etip, elimizdiń barlyq azamattaryn únemi antiseptikterdi paidalanýǵa jáne betperde taǵýǵa shaqyrdy.
– Biz barlyq qalalardaǵy negizgi kóshelerde azamattarymyzǵa tegin maska tarata alatyndai bolýymyz kerek. Bul Úkimettiń aldynda turǵan asa jedel ári shuǵyl mindet, – dedi Prezident.
Qasym-Jomart Toqaev pandemiianyń 160-tan astam elge taralǵanyn atap ótip, shekaralas memleketterdiń Úkimetterimen is-qimyldardy úilestirýdiń mańyzdylyǵyna nazar aýdardy.
– Sońǵy birneshe kúnde Reseidiń, Ózbekstannyń, Qyrǵyzstannyń Prezidentterimen sóilestim. Negizinen biz Úkimetterimizdiń tyǵyz yqpaldasa jumys isteýi kerektigi jaiynda áńgimelestik. Bul ortaq másele bolǵandyqtan birlesken jumystardy arttyra túsýimiz kerek. Birlese áreket etken jón, - dedi Memleket basshysy.
Qazaqstan Prezidenti elimizde karantin rejimin saqtaýdyń mańyzdylyǵyna toqtalyp, barlyq azamattardy, onyń ishinde, memlekettik qyzmetshilerdi belgilengen tártip boiynsha jumys isteýge shaqyrdy.
– Baqylaý-ótkizý beketterin qoiǵanymyz ázil nemese qoiylym emes. Karantin rejimin qatań saqtamai, biz bul baǵytta eshqandai tabysqa qol jetkize almaimyz. Biz karantin jaǵdaiyn qatań saqtaýǵa tiispiz, – dedi Prezident.
Qasym-Jomart Toqaev otandyq meditsinany, sonyń ishinde, sanitarlyq-epidemiologiialyq qyzmetti jáne meditsina ǵylymyn damytýǵa basa mán berý kerek ekenin aitty.
– Qazir búkil álemniń jáne búkil álemdik ekonomikanyń taǵdyry ǵalymdardyń qolynda. Bul artyq aitqandyq emes. Álemniń taǵdyryn fýtbolshylar, shoý-biznes ókilderi emes, ǵalymdar sheshedi. Biz osy jaǵdaidan sabaq alýǵa tiispiz, - dedi Memleket basshysy.
Sońynda Qasym-Jomart Toqaev barlyq meditsina qyzmetkerlerine koronavirýs pandemiiasyna qarsy kúreske qosqan úlesi úshin rizashylyǵyn bildirdi.
