Memleket basshysy birqatar oblys ákimin qabyldady, - dep habarlaidy "Ult aqparat" Aqorda saityna silteme jasap.
Batys Qazaqstan oblysynyń ákimi Nariman Tóreǵaliev Qasym-Jomart Toqaevqa óńirdiń biylǵy áleýmettik-ekonomikalyq damýynyń negizgi kórsetkishteri týraly baiandady. Sondai-aq investitsiialyq jobalardyń jáne Jumyspen qamtý jol kartasynyń júzege asyrylý barysy týraly málimet berildi.
Sonymen qatar Prezidenttiń qabyldaýynda bolǵan Pavlodar oblysynyń ákimi Asaiyn Baihanov Ekibastuz JES-iniń jylý jelilerindegi apattyń saldaryn joiýǵa baǵyttalǵan sharalar jóninde esep berdi. Onyń aitýynsha, Ekibastuz qalasynyń jylý júiesin qalpyna keltirý jumystary 15 jeltoqsanǵa deiin aiaqtalady. Kezdesýde oblystyń negizgi áleýmettik-ekonomikalyq kórsetkishteri jáne aýyl sharýashylyǵyn damytý, aýyl halqyn sapaly aýyzsýmen qamtamasyz etý, kólik infraqurylymy men turǵyn úi qurylysyn damytý jónindegi tapsyrmalardyń oryndalý barysy baiandaldy.
Budan keiin Memleket basshysynyń qabyldaýynda Soltústik Qazaqstan oblysynyń ákimi Aidarbek Saparov boldy. Ol óńirdi damytý jospary men berilgen tapsyrmalardyń oryndalýy jóninde málimet berdi.
Qasym-Jomart Toqaevqa Qumar Aqsaqalov Qostanai oblysynyń qazirgi áleýmettik-ekonomikalyq damýynyń negizgi kórsetkishteri týraly esep berip, óńirdegi áleýmettik-ekonomikalyq ósim men investitsiia tartý jóninde baiandady. Sonymen qatar ákim Prezidentke Qostanaida ótetin HIH óńiraralyq forýmǵa daiyndyqtyń bastalǵanyn jetkizdi.
Memleket basshysy jańadan taǵaiyndalǵan oblystardyń ákimderine óńirlerdi damytý jáne turǵyndardyń ál-aýqatyn arttyrý jóninde birqatar naqty tapsyrma berdi. Sondai-aq aýyl sharýashylyǵyna jan-jaqty qoldaý kórsetý arqyly aýyldardyń órkendeýin qamtamasyz etýdi, infraqurylymdardy jańǵyrtyp, kólik-logistikalyq ahýaldy jaqsartýdy tapsyrdy.
