Qasym-Jomart Toqaev Naýryz merekesi qarsańynda elimizdiń birqatar azamatyn memlekettik nagradalarmen marapattady, - dep habarlaidy "Ult aqparat" Aqorda saityna silteme jasap.
Naýryz merekesi qarsańynda Qazaqstan Respýblikasy Prezidentiniń Jarlyǵymen eldiń áleýmettik-ekonomikalyq jáne mádeni damýyna qosqan eleýli úlesi, belsendi qoǵamdyq qyzmeti, azamattardy qorǵaýda jáne qutqarýda kórsetken jeke janqiiarlyǵy, qoǵamdyq tártipti qamtamasyz etýge kórsetken kómegi úshin elimizdiń bir top azamaty memlekettik nagradalarmen marapattaldy. Olardyń qatarynda óndiris, densaýlyq saqtaý salalarynyń qyzmetkerleri, biznes ókilderi, mádeniet jáne ǵylym qairatkerleri, sportshylar, volonterler bar.
«Qazaqstannyń Eńbek Eri» ataǵy Qazaqstan Respýblikasynyń áleýmettik-gýmanitarlyq damýyndaǵy asa úzdik jetistikteri úshin jazýshy Ilia Jaqanovqa, elimizdiń densaýlyq saqtaý salasyn damytýdaǵy asa úzdik jetistikteri úshin Qazaq taǵamtaný akademiiasynyń prezidenti Tóregeldi Sharmanovqa berildi.
«Otan» ordenimen aqyn Nurjan Svetqali; I dárejeli «Barys» ordenimen L.Gýmilev atyndaǵy Eýraziia ulttyq ýniversitetiniń professory Jandarbek Málibekuly, aqyn Nurlan Orazalin; III dárejeli «Barys» ordenimen Almaty oblysy Ardagerler keńesiniń tóraǵasy Ermek Kelemseiit, Almaty qalasy Qazaqstan halqy Assambleiasy Qoǵamdyq kelisim keńesiniń tóraǵasy Ahmetjan Shardinov, Kúres federatsiiasynyń prezidenti Dáýlet Turlyhanov, ál-Farabi atyndaǵy Qazaq ulttyq ýniversitetiniń rektory Janseiit Túimebaev, L.Gýmilev atyndaǵy Eýraziia ulttyq ýniversitetiniń prorektory Dihan Qamzabekuly, Almaty oblysy ákiminiń birinshi orynbasary Lázzat Turlashov jáne basqalar nagradtaldy.
«Parasat» ordenimen mádeniet, ǵylym jáne bilim qairatkerleri, buqaralyq aqparat quraldarynyń ókilderi marapattaldy. Olardyń qatarynda Ulttyq ǵylym akademiiasynyń múshesi Kárimbek Kurmanáliev, M.Qozybaev atyndaǵy Soltústik Qazaqstan ýniversitetiniń aǵa oqytýshysy Pavel Afanasev, Parlament Májilisiniń depýtattary Berik Ábdiǵaliuly, Edil Jańbyrshin bar.
Sportty damytý direktsiiasy paýerlifting komandasynyń jetekshisi Sergei Tsyrýlnikov II dárejeli «Dostyq» ordenimen marapattaldy.
«Qurmet» ordenimen saiasattanýshy Daniiar Áshimbaev, Qoldanbaly etnosaiasi zertteýler institýtynyń direktory Talǵat Qaliev, Adam quqyqtary úshin hartiianyń atqarýshy direktory Jemis Turmaǵambetova, Taraz qalalyq kópbeiindi aýrýhanasynyń bólim meńgerýshisi Ernar Edilbaev, belsendi Orynbasar Seiitov, «Mir Evrazii» qorynyń prezidenti Edýard Poletaev, Shymkent qalasy Aýǵan soǵysy ardagerleri odaǵynyń tóraǵasy Ǵalymjan Maihanov, qoǵam qairatkeri Dáýren Tálipov, jyrshy Arǵyn Bisenov, Q.Ospanov atyndaǵy №1 balalar-jasóspirimder sport mektebiniń basshysy Nurjan Ermaǵambetov, Almaty qalalyq №7 klinikalyq aýrýhanasynyń bólim meńgerýshisi Esenai Espenbetov nagradtaldy. «Qurmet» ordenine jalpy 94 adam ie boldy.
«Eren eńbegi úshin» medalimen «Adyrna» qorynyń prezidenti Arman Áýbákir, Pavlodar oblysy aýmaqtyq kásipodaqtar birlestiginiń baspasóz hatshysy Konstantin Mýzalevskii, Qazaq ulttyq óner ýniversitetiniń aǵa oqytýshysy Ularbek Nurǵalym marapattaldy. Osy medalmen barlyǵy 25 adam nagradtaldy. «Shapaǵat» medaline 68 volonter, metsenat jáne basqa da azamattar ie boldy. Olardyń qatarynda jýrnalist Aleksandra Myskina, «Úmit-Nadejda» múgedekter uiymynyń tóraǵasy Dúisenǵali Ospanov, «Okean» PIK jumyskeri Arlan Mútishev, «Paybox.money» JShS departament direktory Mariia Chechina, R.Baiseiitov atyndaǵy Semei qarjy-ekonomikalyq kolledjiniń stýdenti Mereibek Maǵabilov, «Bogatyr-Kómir» JShS jol mashinalaryn retteýshi Evgenii Sharifýllin, volonter Aigerim Dosqalieva bar.
