Prezident Qasym-Jomart Toqaev qazaqstandyq akter jáne kinorejisser Doshan Joljaqsynovty marapattaý týraly Jarlyqqa qol qoidy, - dep habarlaidy "Ult aqparat" akorda.kz saityna silteme jasap.
"Ulttyq mádenietti, kinematografiiany jáne teatr ónerin damytýǵa qosqan airyqsha eńbegi úshin Doshan Qaliuly Joljaqsynovty "Otan" ordenimen nagradtaý týraly qaýly etemin", - delingen Jarlyqta.
Jarlyq qol qoiylǵan kúninen bastap qoldanysqa engiziledi.
7 qazanda Doshan Joljaqsynov óziniń 70 jyldyq mereitoiyn atap ótedi.
Doshan Joljaqsynov 1951 jyly 7 qazanda Shyǵys Qazaqstan oblysy Balyqshy kentinde dúniege kelgen. Keńestik jáne qazaqstandyq akter, kinorejisser. Qazaqstannyń Halyq ártisi (1994), Qazaqstannyń eki Memlekettik syilyǵynyń laýreaty (1996 jáne 2016). Qyrǵyzstannyń eńbek sińirgen ártisi (1994).
Joljaqsynov teatr men kinoda 200-den astam beinelerdi somdady. Teatrda oinaǵan alǵashqy róli – H.Vahitovtyń “Altyn kórse perishte joldan taiady” spektaklindegi Qylyshbek (1972).
Budan keiin oryndaǵan rólderi qatarynda Symatbek (J.Táshenov pen I.M. Savvinniń “Qaladan kelgen qyljaqbasynda”), Syrym (R.Seisenbaev pen E.Obaevtyń "Ózimdi izdep júrmininde"), Qazaqbai (Á.Tarazi men Q.Ysqaqovtyń "Apa, apataiynda"), Sámet, Aqan (Ǵ.Músirepovtiń "Qazaq soldaty" men "Aqan seri – Aqtoqtysynda"), Glýmov (A.N. Ostrovskiidiń "Adam alasy ishindesinde"), Ázbergen (Á.Tarazidiń "Qndetinde", Qazaqstannyń Memleket syilyǵyn, 1996; Túrki tildes halyqtar teatrlary baiqaýynyń bas júldesi, Qazan, 1998), t.b. bar. Joljaqsynovtyń akterlik ónerine sezim tereńdigi, sahnalyq áreket shynaiylyǵy tán.
Akter halyq ánderi men qazirgi kompozitorlar ánderin sheber oryndaýshy retinde de tanymal. Joljaqsynov – ulttyq kino óneriniń damýyna eleýli úles qosqan akterlerdiń biri. Áskerbek ("Gahartasta", 1976), Hamit ("Daladaǵy qýǵynda", 1979), Murat ("Altyn kúzde", 1979), Mundyzbai ("Aq barystyń urpaǵynda", 1984, sońǵy ekeýi "Qyrǵyzfilmde"), Dáýir ("Ompada", 1997), t.b. rólderi arqyly Joljaqsynov daryndy kinoakter retinde keńinen tanymal boldy.
