Foto: Akorda.kz
Qazaqstan Prezidenti Bashqurtstan Respýblikasynyń basshysy Radii Habirovty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaev Astana men Máskeýdiń ekijaqty bailanystaryn nyǵaitýǵa óńiraralyq yqpaldastyq eleýli úles qosyp otyrǵanyn atap ótti. Osy oraida Bashqurtstan Respýblikasy erekshe ról atqarady.
– Qazaqstan men Resei arasyndaǵy jan-jaqty qatynastarǵa tyń serpin berý turǵysynan alǵanda búgingi saparyńyzdyń máni zor. Biz indýstriia, agroónerkásip kesheni jáne gýmanitarlyq salalardaǵy bailanystarymyzdy ártaraptandyrý úshin barynsha kúsh salamyz, – dedi Memleket basshysy.
Prezident birqatar kelisimniń, sonyń ishinde úkimetter deńgeiinde qol qoiylǵan Yntymaqtastyqtyń 2023-2024 jyldarǵa arnalǵan jol kartasynyń tabysty júzege asyrylyp jatqanyna nazar aýdardy.
Memleket basshysy elimizdiń óńirleri men Bashqurtstan arasyndaǵy taýar ainalymynyń qarqynyn oń baǵalady. Byltyrǵy 11 aidyń qorytyndysy boiynsha saýda-sattyq deńgeiiniń kórsetkishi 350 million dollardan asty. Bul rette Qazaqstan Bashqurtstan Respýblikasynyń jetekshi saýda seriktesteriniń úshtigine kiredi.
Óz kezeginde Radii Habirov qazaq jerinde qonaqjailyq kórsetkeni úshin Qasym-Jomart Toqaevqa alǵys aitty.
– Bashqurtstan men Qazaqstan arasyndaǵy qarym-qatynasty damytýǵa erekshe mán beretinińizdi bilemiz. Menimen birge úlken delegatsiia keldi. 2-3 jyldyń ishinde biz taýar ainalymy men ónerkásip kooperatsiiasynyń kólemin aitarlyqtai ulǵaittyq. Búgin «Qazaqstan – Bashqurtstan» forýmyn ashtyq. Biz úshin Qazaqstan – eń basty seriktes. Biz munda ózimizdi erkin sezinemiz, – dedi Radii Habirov.
Kezdesýde saýda-ekonomikalyq, mádeni-gýmanitarlyq, ónerkásip jáne ózara múddeni kózdeitin basqa da salalardaǵy yntymaqtastyqty jandandyrýǵa basa mán berildi.
