Prezident Qasym-Jomart Toqaevtyń tóraǵalyǵymen Reformalar jónindegi joǵary keńestiń kezekti otyrysy ótti, dep habarlaidy "Ult aqparat" Aqordaǵa silteme jasap.
Áleýmettik qamsyzdandyrý salasyndaǵy reformalardy iske asyrý jóninde Premer-Ministrdiń orynbasary Eraly Toǵjanov baiandama jasady. Ol áleýmettik kodekstiń ázirlenýi, zeinetaqy júiesiniń jańǵyrtylýy týraly aitty. Atalǵan másele boiynsha Prezidenttiń ekonomikalyq damý máseleleri jónindegi shtattan tys keńesshisi Ser Sýma Chakrabarti de óz pikirin bildirdi.
Baiandamany jáne qatysýshylardyń pikirlerin tyńdaǵan Memleket basshysy pandemiia áleýmettik-ekonomikalyq damýdyń problemalaryn ashyp kórsetkenin jáne olardyń shielenise túskenin atap ótti. Prezident halyq tabysynyń ósý qarqyny baiaýlap, áleýmettik teńsizdik máselesiniń ýshyǵýy basty túitkilderdiń biri dep sanaidy. Onyń aitýynsha, búkil álemdegidei Qazaqstanda da biznes pen halyqqa qoldaý kórsetý úshin daǵdarysqa qarsy ártúrli shuǵyl bastamalar men sharalar júzege asyryldy. Bul táýekel-qaterlerdi azaitýǵa jáne elimizdiń ekonomikalyq ahýalyn turaqtandyrýǵa múmkindik berdi.
– Úkimet tiisti sharalardy qabyldady dep sanaimyn. Pandemiiadan sabaq alyp, áleýmettik saiasatymyzdy jańa jaǵdailarǵa júieli túrde beiimdeýimiz kerek. Jalpy, usynylyp otyrǵan maqsattar men mindetterdi qoldai otyryp, ázirlenip jatqan Áleýmettik kodekstiń jańa «qoǵamdyq sharttyń» negizgi bóligine ainalýy qajet ekenin aitqym keledi. Kodeks boiynsha memleket jańartylǵan áleýmettik mindettemelerdiń oryndalýyna kepildik beredi. Alaida, barlyq qazaqstandyq bolashaǵyn oilap, ózderine jaýapkershilik pen mindettemeler ala bastaýy kerek. Áleýmettik jańǵyrýdyń barlyq quraly naqty jumys istep, azamattar men biznes úshin túsinikti bolýǵa tiis, – dedi Prezident.
Jiyn barysynda Prezidenttiń ekonomikalyq damý máseleleri jónindegi shtattan tys keńesshisi Ser Sýma Chakrabarti men Qarjy naryǵyn retteý jáne damytý agenttiginiń tóraǵasy Madina Ábilqasymova bank sektorynyń damýy jáne qundy qaǵazdar naryǵy týraly tiimdi makroekonomikalyq saiasat boiynsha Konsýltativtik komitettiń esebin usyndy.
Ulttyq qor men Biryńǵai jinaqtaýshy zeinetaqy qoryn basqarý strategiiasynyń tiimdiligin arttyrý jóninde Ulttyq bank tóraǵasy Erbolat Dosaev baiandama jasady. Aktivterdi basqarý strategiiasyn odan ári jetildirý úshin jańa strategiialyq allokatsiiaǵa kóshý, investitsiialyq úderiske ESG faktorlaryn engizý, aktsiialardyń portfelderin hedjerleý (naryqtyq táýekel-qaterlerden saqtandyrý), sondai-aq aktivterdi basqarý úderisteriniń tsifrlandyrylýyn qamtamasyz etý sharalary usynyldy.
Ulttyq banktiń boljamyna sáikes kepildendirilgen transfertterdiń azaiýyna bailanysty 2022-2030 jyldar aralyǵynda Ulttyq qorǵa túsetin qarjy kólemi 20 milliard dollardy quraidy. Nátijesinde Ulttyq qordyń aktivteri 2030 jylǵa qarai 100 milliard dollarǵa jetedi. Onyń keminde 50 paiyzy investitsiialyq tabystan túsedi.
Biyl Reformalar jónindegi joǵary keńes el damýynyń barlyq baǵytyn qamtityn 20-dan asa máseleni qarastyrdy.
Jiyn sońynda keńes músheleri aldaǵy 2022 jylǵa arnalǵan jumys josparyn bekitti.
