Foto: Akorda.kz
Memleket basshysy Qasym-Jomart Toqaev Birikken Arab Ámirlikteriniń Prezidenti sheih Muhammed ben Zaid Ál Nahaianmen kelissóz júrgizdi, - dep habarlaidy "Ult aqparat" Aqorda saityna silteme jasap.
Qasym-Jomart Toqaevty saltanatty qarsy alý rásimi «Ál-Ýatan» saraiynda ótti.
Memleket basshysynyń qurmetine 21 ret zeńbirekten oq atylyp, Qazaqstannyń ánurany oryndaldy. Qasym-Jomart Toqaev pen sheih Muhammed ben Zaid Ál Nahaian bir-birine iltipat bildirip, Qurmet qaraýylynyń bastyǵy memleketter basshylaryna raport berdi. Prezidentter eki eldiń resmi delegatsiia múshelerin tanystyrǵannan keiin Qasym-Jomart Toqaev Qurmetti qonaqtar kitabyna qoltańba qaldyrdy.
Saltanatty qarsy alý rásiminen keiin eki el basshylary keńeitilgen quramda kelissóz júrgizdi.
Memleket basshysy qurmet kórsetkeni úshin sheih Muhammed ben Zaid Ál Nahaianǵa alǵys aitty. Sondai-aq biyl shetelge alǵashqy resmi sapary Birikken Arab Ámirlikterinen bastalyp otyrǵanyn atap ótip, eki eldiń yntymaqtastyǵyn nyǵaitýda bul sapardyń mańyzy zor ekenine nazar aýdardy.
– Ámirlikter – islam jáne arab álemindegi bizdiń senimdi ári basty strategiialyq seriktesimiz. Sizdiń elińiz táýelsizdiktiń alǵashqy jyldarynan bastap Qazaqstanǵa qoldaý kórsetip keledi. Qazaq halqy muny eshqashan umytpaidy. Ásirese, elordamyzdy kórkeitýge Arab Ámirlikteri zor úles qosty. Bul – shynaiy dostyqtyń aiqyn kórinisi, – dedi Memleket basshysy.
Qasym-Jomart Toqaev byltyr Qazaqstan men BAÁ arasynda diplomatiialyq qatynas ornaǵanyna 30 jyl tolǵanyn eske saldy. Sonymen birge osy kezeńde túrli saladaǵy yntymaqtastyq nyǵaia túskenin, eki el arasynda mazmundy ári ashyq saiasi dialog ornaǵanyn atap ótti.
– Eki eldiń qarym-qatynasynda túrli salada jetistikter az emes. Degenmen eki memleket arasyndaǵy yntymaqtastyqqa tyń serpin beretin kez keldi. Osy sátti paidalanyp, Sizge zor alǵysymdy bildiremin, – dedi Prezident.
Óz kezeginde Birikken Arab Ámirlikteriniń Prezidenti sheih Muhammed ben Zaid Ál Nahaian 1992 jyly diplomatiialyq qarym-qatynas ornatylǵannan beri eki eldiń yntymaqtastyǵy joǵary deńgeige kóterilgenine toqtalyp, Qazaqstanmen saiasi jáne ekonomikalyq bailanystar aiasyn keńeitýge nietti ekenin jetkizdi.
– Elderimizdiń energetika, ǵarysh, tehnologiia, saýda salalaryndaǵy yntymaqtastyq áleýeti joǵary dep sanaimyz. Osy sapar barysynda jańartylatyn energiia salasynda mańyzdy qujattarǵa qol qoiyldy. Kelisilgen jobalardyń tolyqqandy júzege asatynyna zor úmit artamyn. Elderimizdiń aýaǵa taralatyn kómirtegi mólsherin azaitý jónindegi josparlary da uqsas. Birikken Arab Ámirlikteri kómirtegi beitaraptaǵyna 2050 jylǵa deiin jetýdi josparlasa, Qazaqstan bul maqsatty 2060 jylǵa deiin oryndaýdy kózdep otyr. Bul – bizdiń bolashaq urpaq úshin óte mańyzdy másele, – dedi Birikken Arab Ámirlikteriniń Prezidenti.
Kelissóz barysynda Qazaqstan men Birikken Arab Ámirlikteriniń arasynda saýda-ekonomikalyq jáne investitsiialyq yntymaqtastyqty damytýdyń basym baǵyttary talqylandy. Atap aitqanda, taraptar jańartylatyn energetika, azyq-túlik qaýipsizdigi men aýyl sharýashylyǵy, taý-ken, kólik-logistika, qurylys-development jáne halyqaralyq qarjy ortalyqtary arasyndaǵy yntymaqtastyq syndy perspektivaly salalar boiynsha ekijaqty yntymaqtastyqty nyǵaitý jóninde ýaǵdalasty.
Ekijaqty yntymaqtastyqtyń basqa da basym baǵyttary Memleket basshysy Qasym-Jomart Toqaev pen Birikken Arab Ámirlikteriniń Prezidenti sheih Muhammed ben Zaid Ál Nahaiannyń Birlesken málimdemesinde jariialandy.
Resmi sapar aiasynda mynadai qujattarǵa qol qoiyldy:
1. Qazaqstan Respýblikasynyń Úkimeti men Birikken Arab Ámirlikteriniń Úkimeti arasyndaǵy Strategiialyq investitsiialyq jobalardy qurý týraly birlesken deklaratsiia;
2. Qazaqstan Respýblikasynyń Indýstriia jáne infraqurylymdyq damý ministrligi men Birikken Arab Ámirlikteriniń Bas azamattyq aviatsiianyń basqarmasy arasyndaǵy ózara túsinistik týraly memorandým;
3. Qazaqstan Respýblikasynyń Energetika ministrligi, «KIDF» qory jáne «Masdar» kompaniiasy arasyndaǵy Qaǵidattar týraly kelisim;
4. «KIDF» qory men «Masdar» kompaniiasy arasyndaǵy yntymaqtastyq týraly kelisim;
5. Qazaqstan Respýblikasynyń Indýstriia jáne infraqurylymdyq damý ministrligi jáne «Abu Dhabi Ports» kompaniiasy arasyndaǵy ózara túsinistik týraly memorandým;
6. «QazMunaiGaz» UQ» AQ jáne «Abu Dhabi Ports Group» kompaniiasy arasyndaǵy Strategiialyq áriptestik týraly kelisim;
7. Qazaqstan Respýblikasynyń Densaýlyq saqtaý ministrligi men Birikken Arab Ámirlikteriniń Densaýlyq saqtaý jáne profilaktika ministrligi arasyndaǵy Densaýlyq saqtaý salasyndaǵy yntymaqtastyq jónindegi ózara túsinistik týraly memorandým;
8. QR Prezidenti janyndaǵy Memlekettik basqarý akademiiasy men Anýar Gargash atyndaǵy Diplomatiialyq akademiia arasyndaǵy ózara túsinistik týraly memorandým;
9. Qazaqstan Respýblikasy Prezidentiniń Arhivi men Birikken Arab Ámirlikteriniń Ulttyq kitaphanasy men arhivteri arasyndaǵy Arhiv isi salasyndaǵy halyqaralyq bailanystardy júzege asyrý jónindegi kelisim.
