Prezident Qasym-Jomart Toqaev memlekettik nagradalar men syilyqtardy tapsyrý saltanatty rásiminde elimizdegi eń ulyq mereke – Respýblika kúnimen quttyqtap, bul - qazaqtyń san ǵasyrlyq memlekettilik dástúri jańǵyrǵan kún ekenin atap ótti, - dep habarlaidy "Ult aqparat" Aqordanyń baspasóz qyzmetine silteme jasap.
"Bul – bostandyq úshin kúresken babalar armany aqiqatqa ainalǵan kún. 1990 jyly 25 qazanda Qazaqstannyń Egemendigi týraly deklaratsiia qabyldandy. Bul qujat Táýelsizdigimizdiń saiasi-quqyqtyq negizin qalyptastyrdy. Bir sózben aitsaq, Deklaratsiia – elimizdiń táýelsizdik alýyna jol ashqan aqjoltai qujat.
Qazaqta «Egemen bolmai, el bolmas» degen tereń maǵynaly sóz bar. Keide «Azattyq Qazaqstanǵa kezdeisoq buiyrdy, elimiz táýelsizdigin eń sońǵy bolyp jariialady» degen birjaqty, ústirt tujyrymdar aitylyp qalatyny jasyryn emes. Bul – sol kezdegi jaǵdaidy durys baǵamdai almaǵan adamdardyń sózi. Shyn máninde, egemendikke bastaityn qasietti joldy halqymyz uzaq jyldar boiy júrip ótti" - dedi Memleket basshysy.
Prezident sózinshe, el aǵalary jáne ziialylar ulttyń sanasyn saqtaý úshin qolynan kelgenniń bárin jasady. Sondai-aq, eldiń rýhyn kóteretin astarly kórkem shyǵarmalar jaryq kórdi.
"Ultymyzdyń azattyqqa degen umtylysy Jeltoqsan oqiǵasy kezinde aiqyn kórindi.
Egemendik deklaratsiiasyn halyqtyń jan-jaqty jáne uzaq jylǵy kúresiniń nátijesi deýge bolady. Árine, mundai qadamǵa barý ońai bolǵan joq. Elimizdiń sol kezdegi saiasi-áleýmettik jáne demografiialyq ahýaly turǵysynan qarasaq, bul óte batyl áreket bolatyn.
Egemendik deklaratsiiasy – táýekel men diplomatiianyń, aqyl men sabyrdyń jemisi. Osy tarihi qujattyń áseri kóp uzamai baiqala bastady. Biz qoǵamnyń irgetasyn jańartyp, jańa belesterge umtyldyq. Qazaqstan qiyn ótkelden ótip, irgeli el bolýǵa baǵyt ustady. Uly Abai aitqandai, «aqyryn júrip, anyq basa» otyryp, eshqandai dúrbeleńsiz táýelsizdikke qol jetkizdik. Eń bastysy – biz babalar ańsaǵan azat elge ainaldyq. Álem moiyndaǵan, qurmet tutqan memleket atandyq. Munyń barlyǵy – búkil halqymyzdyń ortaq eńbeginiń jemisi. Respýblika kúniniń basty qundylyǵy – osynda" - dedi Toqaev.
