Memlekt basshysy Qasym-Jomart Toqaev Aýǵanstandaǵy jaǵdai boiynsha kúshtik qurylymdardyń basshylarymen jiyn ótkizdi. Bul týraly Qazaqstan Prezidenti tvitter paraqshasynda jazdy, dep habarlaidy "Ult aqparat".
«Aýǵanstandaǵy jaǵdai boiynsha kúshtik qurylymdardyń basshylarymen jiyn ótkizdim. AIR-daǵy azamattarymyz ben diplomattarymyzdyń qaýipsizdigin qamtamasyz etý jóninde tapsyrma berdim. Qazaqstan Aýǵanstandaǵy jaǵdaidyń ýshyǵyp bara jatqanyna alańdaýshylyq bildiredi. Ahýal muqiiat baqylaýda. Prezident Ákimshiligi men Syrtqy ister ministrligine Aýǵanstanǵa qatysty máseleler boiynsha memlekettik organdardyń qyzmetin úilestirý tapsyryldy. Kabýldaǵy Qazaqstan elshiligi shaǵyn quramda jumys isteýde. Qyzmetkerlerdiń qaýipsizdigin qamtamasyz etý sharalary qabyldanyp jatyr», - dep jazdy Prezident.
Eske salaiyq, Aýǵanstanda úkimettik kúshter men Qazaqstanda tyiym salynǵan "Taliban" qozǵalysynyń sodyrlary arasynda qaqtyǵys júrip jatyr. Sońǵy ailarda olar aitarlyqtai kóp aýmaqty iemdenip, iri qalalarǵa shabýyl jasady. Eskalatsiia AQSh pen olardyń NATO-daǵy odaqtastary Aýǵanstannan áskerin shyǵarǵannan keiin bastaldy.
Buǵan deiin sheteldik BAQ ókilderi tálipter Aýǵanstan aýmaǵynyń 90 paiyzyn baqylaýyna alǵanyn habarlaǵan bolatyn. Osylaisha, Aýǵanstandaǵy iri qalalardyń ishinen Kabýl men Jelalabad, Pákistanmen shekaradaǵy Nangarhar provintsiiasynyń ortalyǵy ǵana úkimettiń qolynda qaldy.
