Foto: Akorda.kz
Memleket basshysy Astana qalasynyń ákimi Jeńis Qasymbekti qabyldady, - dep habarlaidy "Ult aqparat" Aqordaǵa silteme jasap.
Prezidentke elordanyń áleýmettik-ekonomikalyq jáne infraqurylymdyq damýy týraly baiandaldy.
Qasym-Jomart Toqaevqa negizgi ekonomikalyq kórsetkishter boiynsha oń dinamika bar ekeni jóninde málimet berildi. Biylǵy 10 aidyń ishinde bir trillion teńgeden astam investitsiia tartylǵan. Jyl sońyna deiin jalpy somasy 87,7 milliard teńge bolatyn 25 investitsiialyq jobany, sonyń ishinde óńdeý ónerkásibi salasynda 14, bilim jáne meditsinaǵa qatysty 7, logistika baǵytynda 4 jobany iske qosý josparlanyp otyr. Bul bastamalar 1,4 myń jumys ornyn ashýǵa múmkindik beredi.
Memleket basshysyna jylytý maýsymynyń barysy týraly da aityldy. Atap aitqanda, biyl kúzde «Ońtústik-Shyǵys» gaz jylý stantsiiasynyń, "Turan" gaz jylý stantsiiasynyń birinshi kezeńiniń jáne úshinshi JEO-nyń birinshi kezeńiniń qurylysy aiaqtaldy. Elordanyń tynys-tirshiligin qamtamasyz etetin bul nysandardyń qýaty – saǵatyna 1140 gigakaloriia. Qala uzaq ýaqyttan beri alǵash ret biylǵy jylytý maýsymynda jylý energiiasyna degen suranysty artyǵymen qamtamasyz etetin boldy.
Kelesi jyly «Telman» gaz jylý stantsiiasynyń birinshi jáne "Turan" gaz jylý stantsiiasynyń ekinshi kezeńi paidalanýǵa beriledi dep josparlanyp otyr. Bul nysandar qalany qosymsha 850 Gkal/saǵat jylýmen qamtýǵa septigin tigizedi.
Sonymen qatar Jeńis Qasymbek áleýmettik nysandar (mektep, jeńildikpen beriletin qoljetimdi turǵyn úiler, meditsinalyq ortalyqtar) salý, qurylysy uzaqqa sozylǵan nysandardyń jumysyn aiaqtaý, apatty jaǵdaidaǵy eski úilerdi súrý, turǵyn úi alaptaryn damytý jáne basqa da jumystar jóninde baiandady. Atap aitqanda, kelesi jyly elordada bes oqýshylar saraiynyń, sondai-aq memlekettik balabaqshalardyń qurylysy bastalady.
Kezdesý sońynda Qasym-Jomart Toqaev áleýmettik jáne injenerlik infraqurylymdy odan ári damytý jóninde birqatar tapsyrma berdi.
