Foto: Aqorda
Astanada álemniń eń bedeldi din kóshbasshylarynyń qatysýymen ótken Sezde Memleket basshysy Qasym-Jomart Toqaev qatysýshylarǵa alǵys bildirip, jahandyq syn-qaterler jaǵdaiynda dialog pen kelisimniń mańyzyn atap ótti, dep habarlaidy Ult.kz.
Prezidenttiń aitýynsha, búginde halyqaralyq ahýal ýshyǵyp, qaqtyǵystar kóbeiip keledi. Sondyqtan Sezd – beibitshilikti saqtap, órkenietter arasyndaǵy ózara túsinisti nyǵaitýǵa arnalǵan biregei alań.
«Din basshylaryn gýmanistik kózqarastardy tý etken Beibitshilik elshileri dep aitýǵa bolady. Sizder ortaq múdde úshin birigip, álem jurtshylyǵyn igi maqsat jolynda jumyldyrýǵa niet bildirip otyrsyzdar. Barshańyzǵa shynaiy rizashylyǵymdy bildiremin», – dedi Qasym-Jomart Toqaev.
Memleket basshysy sezdiń 2033 jylǵa deiingi damý tujyrymdamasy júzege asyrylyp jatqanyn jáne onyń qorytyndy deklaratsiiasy BUU Bas Assambleiasynda taralatynyn aitty.
Qazaqstan Prezidenti eldegi etnosaralyq jáne dinaralyq kelisim úlgisine toqtalyp, «Birligimiz – áralýandyqta» qaǵidatynyń mańyzyn atap ótti. Ol Qazaqstandaǵy dini jáne tarihi eskertkishterdiń, qasietti oryndardyń memleket qorǵaýynda ekenin erekshe aitty.
Foto: Aqorda
Sonymen qatar Toqaev álemde órkenietter qaqtyǵysy týraly pikirler beleń alyp otyrǵanyn eske saldy.
«Ásireultshyldyq pen jalǵan patriotizmniń kún sanap beleń alýy alańdatpai qoimaidy. Qalyptasqan túsinikterdiń kóz aldymyzda ózgerýi jastardy adastyrady. Bir jaǵynan biz quqyqtyq konservativti jáne liberaldy ideologiialardyń qaqtyǵysyna kýámiz. Bul birqatar eldi saiasi turaqsyzdyqqa ákeledi. Qazaqstanda osy tektes jahandyq problemalarǵa jiti nazar aýdarylady. Bul – ishki saiasatymyzdyń negizgi ózegi. Túrli etnos, din jáne ult ókilderi arasynda toleranttylyq pen ózara qurmet saiasatyn júrgizý mańyzdy dep sanaimyn. «Birligimiz – áralýandyqta» ustanymyna ziian keltirip, oǵan kúie jaqqysy keletin, sonyń ishinde memlekettik qyzmette jáne qoǵamdyq orynda elimizdi turaqty meken etetin halyqtardyń tilin erkin qoldanýǵa qarsy áreketterge qatań tosqaýyl qoiylady», – dedi Prezident.
Sondai-aq Memleket basshysy sońǵy jyldary Qazaqstanda júrgizilgen saiasi reformalarǵa toqtaldy. Atap aitqanda, Konstitýtsiialyq sottyń qurylýy, ombýdsmen institýtynyń nyǵaiýy, prezidentti jeti jylǵa bir ret sailaý tártibi jáne jaqyn týystarǵa saiasi laýazym atqarýǵa tyiym salý normasy engizilgenin atap ótti.
«Zań jáne tártip» qaǵidaty negizinde elimizde qoǵam turaqtylyǵy men azamattardyń qaýipsizdigin qamtamasyz etý basty mindet bolyp qala beredi», – dedi Toqaev.
