Qazaqstan Prezidenti Qasym-Jomart Toqaev Armeniia Prezidenti Armen Sarkisianmen kezdesti, dep habarlaidy Aqorda.
Kelissóz barysynda Qasym-Jomart Toqaev pen Nur-Sultan qalasyna jumys saparymen kelgen Armen Sarkisian saiasi dialogty, saýda-ekonomikalyq jáne mádeni-gýmanitarlyq bailanystardy nyǵaitýǵa basa mán bere otyryp, qazaq-armian yntymaqtastyǵyn damytý máselelerin talqylady.
Sonymen qatar Prezidentter Eýraziialyq ekonomikalyq odaq, UQShU jáne basqa da halyqaralyq qurylymdar aiasyndaǵy yqpaldastyqtyń perspektivalaryn qarastyryp, jahandyq jáne óńirlik kún tártibindegi máseleler boiynsha pikir almasty.
Memleket basshysy ekijaqty yntymaqtastyqqa tyń serpin berý turǵysynan Armeniia Prezidentiniń osy saparynyń mańyzdy ekenin atap ótti.
– Armeniia – bizge dostas memleket. Elderimiz arasyndaǵy ózara qarym-qatynastar ejelden kele jatqan dástúrlerge negizdeledi. Árine, biz yqpaldastyǵymyzdyń bir ornynda turyp qalmai, jańa mazmunmen tolyǵa otyryp damýyna múddelimiz. Sondyqtan elderimizdiń úkimetteri men naqty salalyq vedomstvolary osy maqsatqa qol jetkizý úshin jumys istep jatyr, – Qasym-Jomart Toqaev.
Qazaqstan Prezidenti túrli salalar boiynsha qarym-qatynastardy nyǵaitý úshin mol múmkindikter bar ekenin atap ótip, Armeniianyń úkimettik delegatsiiasynyń jýyrda Qazaqstanǵa jasaǵan saparynyń qorytyndylaryn oń baǵalady.
Sonymen qatar Memleket basshysy EAEO, UQShU, TMD, BUU jáne EQYU aiasyndaǵy ekijaqty yqpaldastyqtyń jaqsy qarqynmen jalǵasa beretinine senim bildirdi.
Armen Sarkisian óz kezeginde Qazaqstanǵa jumys saparymen kelýge múmkindik jasaǵany úshin Qasym-Jomart Toqaevqa alǵys aitty.
– Men úshin Qazaqstanǵa kelý – belgili bir maǵynada óz úiime, dostaryma kelgenmen birdei. Ózińiz aitqandai, bizdiń halyqtarymyz arasyndaǵy qarym-qatynastar óte jaqsy jáne onyń tarihi tamyry tereńde, – dedi Armeniia Prezidenti.
Armen Sarkisian Qasym-Jomart Toqaevtyń Nur-Sýltan men Erevan arasyndaǵy bailanystardy odan ári keńeitýdiń áleýeti zor degen pikirimen kelisti. Osy rette ol saýda, bilim berý, jańa tehnologiialar, tamaq ónimderin qaita óńdeý salalary boiynsha jasalyp jatqan qolaily sharttarǵa nazar aýdaryp, atalǵan yntymaqtastyqtyń mazmunyn baiytyp, keńeite berýge nietti ekenin jetkizdi.
