Memleket basshysy Sybailas jemqorlyqqa qarsy is-qimyl agenttiginiń tóraǵasy Oljas Bektenovti qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa elimizdegi sybailas jemqorlyqqa qarsy is-qimylǵa qatysty qabyldanyp jatqan sharalar jóninde esep berildi.
Agenttiktiń málimetinshe, biylǵy 5 aidyń ishinde sybailas jemqorlyqqa qatysty 1000-nan astam qylmystyq is tirkelgen. 600-den astam laýazymdy tulǵanyń jemqorlyq áreketi áshkerelengen. Olardyń 110-y ártúrli deńgeidegi basshylar.
Oljas Bektenov memleketke keltirilgen zalaldyń ótelýin qamtamasyz etý jónindegi Prezident tapsyrmasynyń oryndalý barysy týraly málimet berdi. Jyl basynan beri el biýdjetine 220 milliard teńgeden astam qarjy qaitaryldy.
Memleket basshysyna Agenttiktiń bizneske zańsyz aralasýdan qorǵaý tetikterin qalyptastyrý úshin sharalar qabyldaǵany jóninde baiandaldy. Is-qimyl algoritmi ázirlengen. Soǵan sáikes tergep-tekserýdiń bastalýy men kásipkerlerge qatysty kez-kelgen tergeý amaldary ortalyq apparattyń kelisimi arqyly júzege asyrylýǵa tiis.
Sonymen qatar "Atameken" Ulttyq kásipkerler palatasymen birlesip, memlekettik organdardyń bizneske zańsyz aralasý derekterine jedel nazar aýdaratyn jumys toby quryldy.
Kezdesý sońynda Qasym-Jomart Toqaev sybailas jemqorlyqqa qarsy jumystardy kúsheitý jóninde birqatar naqty tapsyrma berdi.
