Foto: Aqorda
Qasym-Jomart Toqaev Rejep Taiip Erdoǵanǵa kóńil aitý jedelhatyn joldady, dep habarlaidy Aqorda.
"Sýyt habardy tereń kúizelispen qabyldadym. Qazaqstan beibit turǵyndarǵa qarsy qastandyq áreketti qatań aiyptaidy. Osyndai aýyr sátte sizge jáne barsha túrik halqyna, sondai-aq qaitys bolǵan azamattardyń jaqyn týystaryna qaiǵyryp kóńil aitamyn. Marqumdardyń jany jannatta bolsyn. Zardap shekkenderdiń tezirek saýyǵyp ketýine tilektestik bildiremin", – dep jazylǵan jedelhatta.
Eske sala keteiik, Ankara qalasynyń mańyndaǵy TUSAŞ aeroǵarysh korporatsiiasynyń ǵimaratyna lańkestik shabýyl jasaldy.
Qarýly top taksi kóligimen kelgen. Olar avtomattarmen, tapanshalarmen qarýlanǵan.
Anadoly agenttigi jariialaǵan sońǵy málimetter boiynsha, 5 adam qaza taýyp, taǵy 22 adam jaraqat alǵan.
