Foto: Akorda.kz
Prezident Almaty qalasynyń ákimi Erbolat Dosaevty qabyldady, - dep habarlaidy "Ult aqparat" Aqorda saityna silteme jasap.
Memleket basshysyna Almaty qalasynyń áleýmettik-ekonomikalyq jaǵdaiy týraly esep berildi. Biyl qańtar aiynda qalanyń qysqa merzimdi ekonomikalyq indikatory investitsiialyq jáne iskerlik belsendiliktiń ósýi esebinen 136,7 paiyzǵa deiin artty. Negizgi kapitalǵa quiylǵan investitsiia kólemi 21,9 paiyzǵa ulǵaidy. Ekonomikanyń damý qarqynyn saýda, kólik jáne óńdeýshi ónerkásip salalaryndaǵy ósim qamtamasyz etti.
Erbolat Dosaev Qasym-Jomart Toqaevqa qalanyń 2040 jylǵa deiingi jańa Bas josparyn ázirleýdiń negizgi tásilderi jóninde baiandady. Ony daiyndaý barysynda Memleket basshysynyń 2022 jylǵy 16 qarashada Almaty jurtshylyǵymen kezdesýinde aitqan tapsyrmalary eskerilgen.
Prezident qalanyń seismikalyq qaýipsizdigin qamtamasyz etý boiynsha usynylǵan sharalar men biylǵy ekinshi jartyjyldyqta seismoaýdit júrgizý josparyn maquldady. Bul shahardaǵy nysandardyń qujattaryn jańartýǵa múmkindik beredi.
Sonymen qatar Memleket basshysyna qala ishinde "jasyl dálizder" jasaý úshin Dúniejúzilik bankpen birlese ázirlenip jatqan is-áreket jospary boiynsha aralyq esep berildi. Bul bastama aiasynda jasyl jelegi mol aýmaqtardyń aýdanyn ulǵaitý, sonyń ishinde ózen arnalary men kanaldar boiyn kógaldandyrý josparlanyp otyr.
Budan bólek Prezidentke Almatynyń Indýstriialyq aimaǵynda avtomobil klasterin qurý barysy baiandaldy.
Kezdesý sońynda Qasym-Jomart Toqaev naqty tabystyń artýyn qamtamasyz etýge jáne qaladaǵy ekologiialyq ahýaldy jaqsartýǵa baǵyttalǵan sharalardy kúsheitý jóninde tapsyrma berdi.
