Foto: Aqordanyń baspasóz qyzmeti
Prezident árqaisysynyń syiymdylyǵy 3000 tekshe metr bolatyn «Balqash» taza aýyzsý stantsiiasynyń eki rezervýarynyń jáne sorǵy stantsiiasynyń qurylysymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa «Kaptaj», «Bastaý» toǵandarynan jáne «Medeý» súzgi stantsiiasynan keletin sýdyń osy rezervýarlarda jinaqtalyp, zararsyzdandyrylatyny jóninde málimet berildi. Tazalanǵan aýyzsý arnaiy ornatylǵan sorǵylardyń kómegimen Kamenskoe plato, Kólsai, Iýbileinyi jáne Muztaý yqshamaýdandarynyń magistraldy jelileri arqyly taratylady.
Nysandy aralap kórý barysynda Memleket basshysyna Almaty qalasyn sýmen qamtý jelisiniń qazirgi jai-kúii men damý jospary týraly baiandaldy.
Prezidenttiń tapsyrmalaryn oryndaý aiasynda qala ákimdigi byltyr jańadan 117 shaqyrym sýmen qamtý jelisin salyp, 46 kilometr sý qubyryn jańǵyrtý jumystaryn júrgizgen. Atalǵan sharalar Almaty halqynyń 99,3 paiyzyn sýmen qamtityn ortalyq jelige qosýǵa múmkindik berdi. Biyl taǵy 142 kilometr sý qubyryn tartyp, 48 shaqyrym jelige jóndeý jumystaryn júrgizý josparlanyp otyr. Bul jyl sońyna deiin turǵyndardyń 99,6 paiyzyna sý jetkizip, jelilerdiń tozý deńgeiin 53,8 paiyzǵa deiin tómendetýge septigin tigizedi.
Sonymen qatar Qasym-Jomart Toqaevqa Medeý aýdanynyń 50 myń turǵynyn sýmen qamtýdyń qosalqy shemasyn iske qosý jospary jóninde málimet berildi. Al Alataý, Bostandyq jáne Naýryzbai aýdandarynyń halqyn sýmen turaqty ári sapaly túrde qamtamasyz etý úshin eki toǵan salynyp jatyr jáne taǵy ekeýiniń jobalaý jumystary júrgizilýde.
Almaty qalasy ákimdiginiń málimetine sáikes biyl Qarǵaly toǵanynyń qurylysyn aiaqtaý josparlanyp otyr. Bul nysan Naýryzbai aýdanynyń 50 myń turǵynyn aýyzsýmen qamtamasyz etedi. Kelesi jyly Aqsai toǵanynyń qurylysyn aiaqtaý kózdelýde. Ol Naýryzbai aýdanyndaǵy 100 myń turǵyn men Almaty oblysy Qarasai aýdanyndaǵy 15 myń turǵynnyń sýǵa qatysty máselesin sheshýge septigin tigizedi.
Qasym-Jomart Toqaev Almaty qalasyn sýmen qamtamasyz etý jalpymemlekettik mańyzy bar basym mindet ekenin atap ótti. Sonymen qatar byltyr Almaty qalasynyń Medeý aýdanynda bolǵan jaǵdaidyń qaitalanýyna jol berýge bolmaitynyn eskertti.
– Elimizde sý tapshylyǵy bar. Bizge jalpy memlekettik baǵdarlama qajet. Baý-baqshany sýarý úshin aýyzsýdy paidalanýǵa bolmaidy. Onyń ornyna sý únemdeý tehnologiiasyn qoldanysqa engizip, jer astynan jańa sý kózderin izdeý qajet. Almatynyń turǵyndary aýyzsýdyń tapshylyǵyna jii shaǵymdanady. Sondyqtan keshendi, júieli jumys júrgizilýi kerek, – dedi Prezident.
