Memleket basshysy Tahaýi Ahtanov atyndaǵy Aqtóbe oblystyq drama teatryna bardy, dep habarlaidy "Ult aqparat" Aqordanyń baspasóz qyzmetine silteme jasap.
Prezident, eń aldymen, Tahaýi Ahtanov pen Qýandyq Shańǵytbaevtyń eskertkishterine gúl shoǵyn qoidy.
Qasym-Jomart Toqaev óńirge jumys sapary aiasynda Tahaýi Ahtanov atyndaǵy Aqtóbe oblystyq drama teatrynyń jumysymen tanysty. Memleket basshysy búginde halyqtyń teatrǵa qyzyǵýshylyǵy artyp kele jatqanyna toqtaldy. Osy oraida Prezident óner ordasy ǵimaratynyń tozǵanyn aityp, oblys ákimine jańa teatr salýdy tapsyrdy.
Qasym-Jomart Toqaev oblys jurtshylyǵy ókilderimen áńgimelesý barysynda elimizde zań ústemdigin saqtaý jáne urpaq tárbiesine basa mán berý kerek ekenin atap ótti.
"Men qai jerge barsam da, zańnyń ústemdigi týraly aityp júrmin. Bul – óte mańyzdy. Olai bolmasa, tabysty memleket qura almaimyz. Jastarmen kezdesken saiyn olardy eńbekqor, tártipti bolýǵa shaqyramyn. Jalpy jastardy tárbieleýge erekshe kóńil bólýimiz kerek. Qazaqstandy damytý – halyqtyń, memlekettiń sharýasy", – dedi Prezident.
Kezdesý sońynda Memleket basshysy Aqtóbe oblysyn kórkeitýge eleýli úles qosyp júrgen túrli salanyń ókilderine rizashylyǵyn bildirdi.
